تورکیه ده توریزم – ۱۰
تروآ، عشق، قهرمانلیق و اویغارلیق یوواسی
تروآ، دونیاداکی ان مشهور آنتیک شهرلردن بیریدیر.
حماسهلره قونو اولموش؛ تاریخین "عشق، قهرمانلیق و اویغارلیق یوواسی" دئیه تانیملادیغی بیر شهر تروآ...چاناققالا بوغازی ساحلینه ۴،۵ کیلومتر مسافهده، قاز داغی اتکلرینده قورولموش اولان بو آنتیک یاشاییش یئری، میلاددان اؤنجه ۳۰۰۰ ایلینه قدر گئدن بیر گئچمیشه صاحب.
هومرین ایلیاد حماسهسینده بحث ائدیلهن تروآ ساواشینین ائدیلدیگی تورپاقلار، قوناقلارینی مینلرجه ایللیک بیر گزینتییه چیخاریر.
اتکلرینده تروآنین قورولدوغو قاز داغی، میتولوژییه گؤره دونیانین ایلک گؤزللیک یاریشماسینین دا ائدیلدیگی یئردیر. گؤزللیک یاریشماسینا قاتیلان گؤزللر هرا، آفرودیت و آتنادیر. سئچیجی وظیفهسینی یئرینه یئتیرهن پاریس، اؤزونه اسپارتا کرالینین آروادی هلنانی وعد ائدن آفرودیتی سئچیر. پاریسین هلنانی قاچیرماسی دا ساواش باشلادیر. ایکی سئوگیلی قاچاراق تروآیا گلیر و بئلهلیکله آکالار ایله تروآ خالقی آراسیندا تخمیناً ۱۰ ایل داوام ائدجک ساواش باشلامیش اولور.
میلاددان اؤنجه ۱۱۸۰لره تاریخلنن تروآ ساواشیندا، ایکی طرف بیر بیرینه قطعی بیر اوستونلوک تامین ائده بیلمهینجه، آکالیلار تروآلیلارا چوخ حیلهلی بیر اویون اوینار. ساواشدان چکیلمیش کیمی ائدیب، باریش سمبولو اولاراق دا تروآیا بیر تاختا آت گؤندریرلر. تاختا آتین ایچینده سئچکین باشچیلار و عسگرلر گیزلنمیشدیر. ساواشدان یورغون دوشن و جوشغویلا باریشی قوتلایان تروآ خالقی، گئجه ایچکینین ده تاثیری ایله یاتیب قالدیقلاریندا، تاختا آتین ایچیندن چیخان ساواشچیلارین اووو اولورلار. تروآنین اولدن آخیرا یاندیریلدیغی قورخونج بیر قتل عامدان سونرا شهر خارابالیغا دؤنور.
تروآ، ساواشلار و طبیعی فلاکتلر سببی ایله دفعهلرجه یئنیدن قورولموش. یاشاییش اوچون الوئریشلی جغرافی قونومو، تاریخ بویو شهرسل یاشاییش ساحهسی کیمی رغبت گؤرمهسینی تامین ائتمیش. ۱۴.جو یوزایلین سونلارینا دوغرو اقتصادی و مدنی اؤنمینی گئتدیکجه ایتیرمیش.
تروآنین ان اؤنملی خصوصیتی، ۹ موختلیف شهر قاتینا صاحب اولماسی. بو ۹ قات، کسینتیسیز اولاراق ۳۰۰۰ ایلدهن آرتیق بیر زامانی گؤستریر و بؤلگهده یاشامیش اویغارلیقلاری ایزلمهمیزی تامین ائدیر.
بو گؤرکملی آرکئولوژیک شهرده ایلک قازینتی ۱۸۷۱.جی ایلده ائدیلدی. سونراکی ایللرده داوام ائدن قازینتیلار نتیجهسینده، تاتر، حاماملار، مختلیف تاپینتیلار ایله سون درجه گلیشمیش بیر کانالیزاسیون سیستمی و یاپی تمللرینه چاتیلمیش. زنگین و مورکب آرکئولوژیک قورولوشون اوزه چیخاریلماسی یولونداکی چالیشمالار گونوموزده ده داوام ائدیر.
بشر تاریخینین بو اؤنم یاشاییش مرکزی ۱۹۹۸.جی ایلدهن یونسکونون دونیا میراث لیستهسینده...
تروآنی گؤرمک اوچون چاناققالایا گئتسهنیز؛ دونیا تاریخینین اؤنملی ساواشلاریندان بیرینین، چاناققالا ساواشینین آردیندان تیکیلن شهیدلیکلری زیارت ائتمنیزی، آسوسدا آتنا تاپیناغینی گزمنیزی، طبیعته ماراغینیز وارسا قاز داغلارینا چیخمانیزی توصیه ائدیریک. گؤکچه آدا و بوزجا آدا دا، مدنی و طبیعی گؤزللیکلرینه حیران قالاجاغینیز، گؤرولمهیه دگر دیگر توریستیک بؤلگهلر آراسیندا یئر آلیر.
ایلگیلیلی خبرلر
تۆرک جمهوریتلرینین گوندمیندهکی گلیشمهلر
۱ ژوئن ۲۰۲۴ تاریخینده شوشادا تۆرک دؤولتلری تشکیلاتی تحصیلدن مسئول باخانلاری ۸.جی ییغینجاغی ائدیلدی