İzrail idaräse Ğazzägä cirdän operaśiyä başlanaçağın sizderde

İzrail xökümäte räise Binyamin Netan’yaxu häm saqlanu ministrı Yoav Gallant armiyäneñ qamalıştağı Ğazzägä cirdän operaśiyä başlawğa yaqınlaşuı turında belderde.

Netan’yaxu Ğazzä çige yänäşäsendäge ğaskärlär belän oçraştı. Anda töşerelgän videonı ul sośial’media platformasında urtaqlaştı häm “Bez äzer” dip yazdı.

İzrail saqlanu ministrı Gallant ta Ğazzä çigendäge berleklär yanına bardı. Ul xärbilärgä möräcäğat’ itep: “Xäzer Ğazzäne yıraqtan küräsez. Tizdän êçke yağın da küräçäksez”,-dide.

Gallant Livan çigendä “Xizbullax” belän bulğan kiyerenkelek xaqında da süz quzğattı. “Xizbullax” suğış başlarğa teläsä, başta Ğazzä şähäreneñ fotoräsemnären qarasın”-dide ministr.

“Xamas” 7nçe oktyabr’dä İzrailgä qarşı “Aqsa tufanı” dip ataluçı külämle höcüm başlawın belderde. Ğazzädän İzrailgä taba meñnärçä raketa atıldı, qorallı törkemnär töbäktäge toraq punktlarğa kerde.

İzrail armiyäse dä xärbi oçqıçlar belän Ğazzädä “Timer qılıçlar” xäräkäte başlawın belderde.

Kiyerenkelek torğan sayın arta. İke yaqta da meñlägän ülüçe bar.