Kaliforniyada yanğın

AQŞta Kaliforniya ştatınıñ tön’yağındağı urman yanğınnarı arqasında ğomere özelüçelärneñ sanı 23kä citte. Paradays şähärçege häm yänäşäsendä tağın 14 keşeneñ cansız gäwdäse tabıldı.  

Ut pänceşämbe könne S’yerra-Nevada tawları itäklärendä başlandı. Bu ştat tarixında iñ cimergeç yanğınnarnıñ öçençese bularaq terkälde.

Cil täêsire belän cäyelüen däwam itüçe yalqın 404 kvadrat kilometr mäydannı biläp aldı. Anda Paradays şähären dä kertep yaqınça 7 meñ qorılma zıyan kürde.

Şul uq waqıtta, kön’yaqta Malibu şähären dä yanğınnar çolğap aldı. Ştat külämendä 300 meñ keşe öçen êvakuaśiyä qararı çığarıldı.

AQŞ ilbaşı Donal’d Tramp Butte, Ventura häm Los-Anjelesqa bäyle toraq punktlarğa federal’ yärdäm täêmin itü öçen ğadättän tış xäl iğ’lan itte. Ul Twitter aşa hälakättä ülgännärneñ yaqınnarınıñ qayğısın urtaqlaşuın belderde. Älege sośial’ çeltärdäge başqa yazmasında ul: “Kaliforniyada bu qadär kiñ külämle, ülemçel häm qıymmätkä töşüçe urman yanğınnarı kiräk tügel. Här yıl milliardlarça dollar häm can kitä. Bolarnıñ säbäbe - urmannarnıñ küpçelek cirdä naçar idarä itelüe. Xäzer ük çara tabığız, yäisä monnan soñ üzäk banknıñ aqçalata yärdäme bulmayaçaq,”-dide. Bu süzlär cämäğat’çelektä zur şaw-şu quptardı.