د کودتا تر ناکام اقدام وروسته د وسله وال پوځ شمېره

په ترکیه کې د ۲۰۱۶م کال د جولای د ۱۵مې نېټې د کودتا له ناکام اقدام وروسته د وسله وال پوځ د پرسونل د شمېرې په اړه د وسله والو ځواکونو د لوی درستیز د مقام لخوا نوي معلومات خپاره شول.

پدې ډول د ترکیې د اوردو د ټولو جنرالانو شمېره ۲۰۳ تنه ده.

د انادولو د آژانس د معلوماتو پر اساس د پلیو، هوايي او بحري ځواکونو په چوکاټ کې د ۲۰۳ تنو جنرالانو په ګډون د ترکي ځواکونو شمېره ۳۵۹ زره ۲۷۳ تنه ده.

پدې لړ کې ۲۶ زره ۲۷۸ تنه یې افسران او پاتې برخه یې سرتیري دي.

پدې کې د  وسله والو ځواکونو د لوی درستیز او د ملي دفاع د وزارت غیر نظامي پرسونل شامل نه دی.

د غیر نظامي مامورینو په ګډون د پوځ ټوله شمېره ۳۹۸ زره ۵۱۳ تنو ته رسیږي.

په ترکیه کې د تېر کال د جولای د ۱۵مې نېټې د کودتا له ناکام اقدام وروسته چې یو شمېر کودتاچي سرتیري، افسران او جنرالان له دندې ګوښه شول، د ترکیې اوردو اوس هم د نړۍ د تر ټولو پیاوړو ۱۰ اوردوګانو په لیکه کې ځای لري.