Маалыматты туура булактан алам

Маалыматты туура булактан алам

Саламатсыздарбы урматтуу угармандар. Программабыздын бүгүнкү чыгарылышында заманыбыздын алып келген ыңгайлуулугу жана ошого жараша күчөп кеткен татаалдыгы тууралуу сөз кылабыз. Сөзүбүздү: «Маалыматка жетүү өтө жеңил болуп калган бүгүнкү күндө мен маалыматты туура булактан алам» деп баштайбыз.

2000-жылдардан бери кеңири жайылып, жашообуздун ажыралгыс бөлүгүнө айланган интернет түз маанисинде дүйнөнү биздин көз алдыбызга жайып берүүдө. Мындан бир аз мурда, жыйырма-жыйырма беш жыл мурун биз кайсы бир тема боюнча толук маалымат алгыбыз келгенде китепканаларга барышыбыз керек болчу, бирок азыр биз издеген нерсеге бир нече мүнөттүн ичинде жете алабыз. Бирок... Биз алган маалыматтын тактыгына канчалык ишенсек болот?

Интернеттеги маалыматтын тактыгына жалпы ишенимди орнотуу кыйын. Анткени интернет маалымат булагы жана андагы маалыматтын сапаты жана тактыгы абдан ар түрдүү. Мунун эң чоң фактору - интернетке кирүү мүмкүнчүлүгү бар ар бир адам интернет аркылуу каалаган тема боюнча маалымат же пикир бөлүшө алат. Тездик жана көз карандысыз булактар ​​сыяктуу артыкчылыктарга ээ болгону менен, өзгөчө жаңылыктарды алууда, бул жалган, ал тургай, фейк кабарлардын тезирээк таралышын шарттайт. Болгондо да, бүгүнкү күндө жасалма интеллект менен жасалма үндөрдүн жана сүрөттөрдүн жасалышы мүмкүн экенин эске алганда, маалыматты тастыктоо зарылдыгы дагы да маанилүү болуп баратат.

Албетте, интернетте факт-чекинг көйгөйлөрү интернет менен кошо пайда болгон жок. Китепте же гезитте жазылгандардын баары чындык болушу мүмкүн эмес. Анткен менен энциклопедиялар же академиялык басылмалар дагы эле эң ишенимдүү булак болуп саналат, анткени алар бул тармактагы эксперттер тарабынан жазылып жана каралат. Жаңылыктарга келсек, мурда бир нече басылган гезиттерди салыштыруу аркылуу белгилүү бир деңгээлде тактыкка жетишүү мүмкүн болсо, бүгүн биз дээрлик чексиз сандагы булактарга туш болуп жатабыз.

Интернетте тараган маалыматтын тууралыгын текшерүү үчүн көптөгөн өлкөлөрдө мамлекеттик жана жеке уюмдар бул максатта иштелип чыккан системаларды колдонуучуларга бекер сунушташат. Бул булактардан кеңешүү, бир нече каналдан кабарды текшерүү жана кабар берген адамдын аброюн текшерүү так маалымат алуу үчүн колдоно турган практикалык ыкмалар. «Маалыматты туура булактан алып жатам, анткени алданып калгым келбейт» деп бүгүн сиздер менен коштошобуз.