Кападокиядагы музей жана тарыхый жерлерге зыяратчылардын агымы

Жылдын ар бир мезгилинде туризмдин активдүүлүгү байкалган негизги борборлордун бири болгон Кападокиядагы музей жана урандыларга зыярат кылгандардын саны өткөн жылы 2020-жылга салыштырмалуу 130 пайызга өстү.

Жомоктогудай жаратылышы жана табигый аскалар менен капталган өрөөндөрү, жарлар оюлуп салынган тарыхый чиркөөлөр, храм жана монастырлары, жер астындагы шаарлары жана түрдүү тур иш-чаралары менен Кападокия жергиликтүү жана чет элдик туристтердин көңүлүн бурууну улантууда.

Ковид-19 чараларынын алкагында 2020-жылы 992 миң 620 зыяратчы келген аймактагы туристтердин саны өткөн жылы 130 пайызга өсүп, 2 миллион 285 миң 895ке жетти.

Аймакка эң көп зыярат 428 миң 883 зыяратчы менен август айында болсо, жыл бою эң көп кызыгуу тарткан жерлердин бири Зельве урандыларын 645 миң 695 турист, Гөреме ачык асман музейин 560 миң 379 турист, Каймаклы жер астындагы шаарын 321 миң 163 турист кыдырды.  

Кападокиядагы музей жана урандылар январь айында 42 миң 560, февралда 50 миң 668, мартта 104 миң 313, апрелде 74 миң 458, майда 61 миң 634, июнда 150 миң 282, июлда 370 миң 534, августта 428 миң 883, сентябрда 288 миң 213, октябрда 346 миң 112, ноябрда 242 миң 826, декабрда 125 миң 412 зыяратчы тартты.

Невшехир туристтик гиддер палатасынын (NERO) төрагасы Өзай Онур аймактын жергиликтүү жана чет элдик коноктор үчүн жагымдуу туризм байлыгына ээ экенин баса белгилеп: «2021-жылы биз көбүнчө Украина, Орусия жана Индонезиядан келген конокторду кабыл алдык», - деди.

NEROнун төрагасынын орун басары Шүкран Чытак да аскадан чегилген тарыхый курулуштардын ичиндеги чиркөөлөр менен дубал сүрөттөрүнүн христиан коомчулугунун көңүлүн бурганын айтты.