"Аккую" атомдук электр станциясынын төртүнчү реакторунун пайдубалы түптөлдү
Аземде сөз сүйлөгөн энергетика жана жаратылыш ресурстары министри Фатих Дөнмез Аккуюнун дүйнөдөгү эң чоң атомдук энергетика долбоору экенине көңүл бурду.
Мерсиндин Гүлнар районунда курулуп жаткан "Аккую" атомдук электр станциясында (АЭС) төртүнчү жана акыркы реактордун пайдубалы азем менен түптөлдү.
Аземде сөз сүйлөгөн энергетика жана жаратылыш ресурстары министри Фатих Дөнмез Аккуюнун дүйнөдөгү эң чоң атомдук энергетика долбоору экенине көңүл бурду.
Министр Дөнмез: «Аккую, Республика тарыхыбыздагы эң ири инвестиция болуп саналат. 4 реактор бүткөрүлгөндө электр энергиясына болгон керектөөбүздүн болжол менен 10 пайызын жалгыз өзү камсыздайт. Чынында биз Аккуюда бир жерде 4 электр станциясын куруп жаткандай элестетсек болот»,-деди.
Долбоордун жүрүшүнө токтолгон Дөнмез: «Түркиянын жарым кылымдан ашык убакытка созулган атомдук энергетикалык саякатында туннелдин учундагы жарык көрүнө баштады»,-деп сыпаттады.
Болжол менен 20 миң адам иштеген Аккую АЭСи дүйнөдөгү эң чоң АЭС курулуш аянтчаларынын бири катары өзгөчөлөнүүдө.
Ар бири 1200 мегаватт VVER-1200 тибиндеги «III+» генерациялык реактору менен 4 блоктон турган жана орнотулган кубаттуулугу 4800 мегаватт боло турган электр станциясынын биринчи блогун Түркия Республикасынын түзүлгөндүгүнүн 100 жылдыгы белгилене турган 2023-жылы ишке киргизүү пландалууда.
Калган 3 агрегатты да бир жыл айырма менен 2026-жылдын аягына чейин ишке киргизүү максат кылынууда.
Толук ишке киргенде жыл сайын болжол менен 35 миллиард киловатт-саат электр энергиясын өндүрө турган станциянын жалгыз өзү Түркиянын электр энергиясына болгон муктаждыгынын 10 пайызын камсыздай турганы болжолдонууда.
Айлана-чөйрөгө зыяндуу парник газдарын чыгарбастан үзгүлтүксүз электр энергиясын өндүрө ала турган Аккую АЭСинин жыл сайын 35 миллион тонна көмүр кычкыл газынын чыгышына тоскоол болоору эсептелүүдө.
