Элван: «Быйыл 8 пайыздан ашуун өсүштү күтүүдөбүз»

Казына жана каржы министри Лүтфи Элван, быйылкы жыл үчүн 8 пайыздан ашуун өсүштү күткөндөрүн айтты.

Кожаэлиде иш дүйнөсү менен жолугушкан Элван өз билдирүүсүндө 2020-жылдын бүткүл дүйнөдө ар түрдүү экономикалык жана социалдык тартип сыналган күрөштүн жылы болгонун, дүйнөлүк экономиканын Экинчи Дүйнөлүк согуштан кийинки эң терең кыскарууну баштан кечиргенин, миллиондогон адамдардын жумушсуз калганын айтты.

Элван Түркиянын пандемиянын саламаттык сактоо жана социалдык-экономикалык кесепеттери менен күрөшүүдө абдан ийгиликтүү болгонун, көрүлгөн чаралардын салымы менен өндүрүштүк кубаттуулугун сактап калганын жана өсүүсүн улантып жатканын билдирип: «Биз 2021-жылдын экинчи чейрегинде өндүрүштүн, экспорттун, кызмат көрсөтүү секторунун жана базалык эффектинин күчтүү калыбына келиши менен 20 пайыздан ашык өсүштү күтүүдөбүз. Эгерде эпидемияга байланыштуу тышкы шок болбосо 2021-жыл үчүн 8 пайыздан ашуун өсүштү күтөбүз», деди.

Элван экспорттоодо июль айынан тарта биринчи жолу жылына 200 миллиард доллардан ашкан рекорд жаңыланганын жана дүйнөлүк экспорттун үлүшү жогорулаганын айтты.

Туруктуу, инклюзивдүү жана жумуш орундарын түзгөн, айлана-чөйрөнү коргогон, жогорку өндүрүмдүүлүктү жана атаандаштыкка жөндөмдүүлүктү камсыз кылган жана баарынан мурда кирешелерди бөлүштүрүүнүн адилеттүүлүгүн эң жакшы жол менен орноткон өсүштү колдоого умтулгандыктарын баса белгилеген Элван, бул алкактын макроэкономикалык стабилдүүлүктү андан ары чыңдоо менен мүмкүн болорун, ошондой эле баанын туруктуулугу, финансылык дисциплина жана финансы секторунун күчтүү максаттарын бузбастан өз жолун уланта беришерин билдирди.