Грузияда «Чет элдик таасирдин ачыктыгы» жөнүндөгү мыйзам долбоору үчүнчү жолу добушка коюлат

Грузиянын премьер-министри Ираклий Кобахидзе нааразылыктарды жараткан «Чет элдик таасирдин ачыктыгы» жөнүндөгү мыйзам долбоорун кабыл алуу үчүн парламентте добуш берүү болорун билдирди.

Ираклий Кобахидзе бийликтеги «Грузин кыялы» партиясы апрель айында парламентке сунуштаган «Чет элдик таасирдин ачыктыгы» жөнүндөгү мыйзам долбоорун жактыруу процесси тууралуу билдирүү жасады.

Каршы чыккан демонстрацияларга карабай бул мыйзам долбоорун мыйзамга айлантууга чечкиндүү экендиктерин белгилеген Кобахидзе, коомдук изилдөөлөргө караганда, калктын 80 пайыздан ашыгы бейөкмөт уюмдардын ачыктыгын колдой турганын, алардын 60 пайыздан ашыгы мыйзам долбооруна түздөн-түз колдоо көрсөткөнүн айтты.

Кобахидзе өкмөт катары парламент 13-14-майда жыйын өткөрүп, коомдун көпчүлүгү колдогон мыйзам долбоору боюнча үчүнчү жана акыркы окуудан өткөрүү үчүн добуш берерин жарыялады.

Оппозициянын ушул убакка чейин бул маселе боюнча конструктивдүү жана деталдуу талкуулардан качканын белгилеген Грузиянын премьер-министри мыйзам долбоорун эл аралык өнөктөштөр менен талкуулоого ачык экенин айтты.

Мыйзам долбооруна каршы уланып жаткан демонстрацияларга токтолгон Кобахидзе айрым демонстранттар зордук-зомбулук акцияларын пландап жатышканын белгиледи.

Кобахидзе: «Бизде радикалдуу оппозиция уюштурган жана чет өлкөдөн каржыланган зомбулукту жактаган жаштар топтору грузин парламентине жана полициясына каршы зордук-зомбулук аракеттерин жасоону пландап жатканы тууралуу белгилүү маалыматтар бар»,-деди.

Грузиянын эгемендүү жана көз карандысыз мамлекет экенин белгилеген Кобахидзе, полиция мүмкүн болгон зордук-зомбулук аракеттерине жооп берерин баса белгиледи.

Премьер-министрден кийин билдирүү жасаган президент Саломе Зурабишвили  «Чет элдик таасирдин ачыктыгы» жөнүндөгү мыйзам долбооруна каршы экенин дагы бир жолу билдирди.

Долбоорду «Орусиянын мыйзамы» деп мүнөздөгөн Зурабишвили эгер ал мыйзам болуп калса, ага вето кое турганын билдирди.

Парламентте 17-апрелде биринчи, 1-майда экинчи добуш берүүдөн өткөн мыйзам долбоору мыйзамга кириши үчүн парламентте үч жолу жактырылышы керек.

Бийликтеги партия президенттин вето койгон чечимин жеңүү үчүн парламенттеги көпчүлүккө ээ.

Сөз болуп жаткан мыйзам долбооруна каршы нааразылык акциялары өлкөдө бир айга жакын убакыттан бери уланууда.

Мыйзам долбоорунда каражатынын 20 пайыздан ашыгын чет өлкөдөн алуу жолу менен түзүлгөн уюмдар «чет элдик державанын кызыкчылыгын көздөгөн уюм» катары каттоодон өтүшү керек, болбосо айыпка жыгылаары белгиленген.