Зеленский Батыштан шашылыш «абадан коргонуу» системасын сурады

Украинанын президенти Владимир Зеленский Евробиримдиктин (ЕБ) лидерлерине Израилге көрсөтүлгөн абадан коргонуу боюнча колдоо анын өлкөсү үчүн да шашылыш экенин билдирген билдирүү жасады.

Владимир Зеленский Бельгиянын борбор шаары Брюсселде өткөн Евробиримдиктин саммитинин Украина бөлүмү менен видеоконференция аркылуу байланышты.

Орусиянын Украинанын Чернигов шаарына мурдагы күнү жасаган ракеталык чабуулунан 14 кишинин каза болгонун эске салган Зеленский: «Тилекке каршы, Украинада биз бир нече күн мурун Жакынкы Чыгышта көргөн коргонуу деңгээлине ээ эмеспиз. Шериктештердин биргелешкен күчү менен алар Израилге багытталган дээрлик бардык ракеталарды жана учкучсуз учуучу аппараттарды атып түшүрүүгө жетишти. Израилдин жана башка региондук мамлекеттердин асманында болгондой эле, Европаны биз баллистикалык ракеталардан жана учкучсуз учуучу аппараттардан, канаттуу ракеталардан жана бомбалардан коргошубуз керек деп эсептейбиз. Биздин асман менен коңшуларыбыздын асманы да ушундай эле коопсуздукка татыктуу»,-деди.

Ирандын 13-апрелде Израилге абадан кол салуусуна бөгөт коюуну АКШ менен Улуу Британиядан тышкары Евробиримдикке мүчө Франция да колдоду.

Бир тараптан Евробиримдик саммитинин тышкы карым-катнаш сессиясында Украина темасы каралгандан кийин жыйынтык декларациянын тиешелүү бөлүгү кабыл алынды.

Декларацияда «Европа Биримдиги Орусиянын Украинанын жарандарына жана жарандык инфраструктурасына, анын ичинде энергетика тармагына карай уланып жаткан аба жана ракеталык чабуулдарын катуу айыптайт»,деген сөздөр орун алды.

Евробиримдик жана ага мүчө өлкөлөрдүн генератор жана күч трансформаторлору сыяктуу жабдыктарды жана гуманитардык жана жарандык коргонуу үчүн жардам материалдарын жөнөтүүнү уланта турганы белгиленген декларацияда, «Евробиримдик Украинага абадан коргонуу, артиллериялык ок-дарыларды жана ракеталарды тез арада камсыздоону камтыган бардык зарыл болгон аскердик жардамды тездетүү жана активдештирүү зарылдыгын белгилейт»,деген баа берилди.