АКШнын Анкарадагы элчиси Жефф Флейк Түркиянын маанисине басым жасады

АКШнын Анкарадагы элчиси Жефф Флейк: «Түркия сыяктуу аймактык күчтөр роль ойнобосо Газада чечимге жетишүү кыйын»,-деди.

MSNBC телеканалынын программасына конок болгон элчи Жефф Флейк, Түркиянын АКШ менен карым-катнаштары, Орусия-Украина согушундагы позициясы жана Израилдин Газага кол салууларына карата мамилесине баа берди.

Флейк: «Түндүктө Украинада согуш бар, түштүктө Газада согуш бар, Түркия так ортодо. 97 пайызы мусулман болгон өлкө катары палестиналыктарга терең жакындыкты сезип жатканы анык. Ошондуктан Израилдин Газага кирүү темасында кылгандарын катуу сынга алышууда. Кепил катары аракет кылууга жана туруктуу тынчтык үчүн башка аймактык өнөктөштөр менен кызматташууга даяр экендиктерин билдиришти. Алар да биз сыяктуу эки мамлекеттүү чечимди колдошот. Ушундан улам бирге иштейбиз деп ойлойм. Түркия сыяктуу аймактык күчтөр роль ойнобосо Газада чечимге жетишүү кыйын»,-деди.

Түркиянын Украинанын эгемендигин да колдогондугун баса белгилеген Флейк, Украинанын Түркиядан сатып алган учкучсуз учуучу учактарынын Орусия менен согушта абдан маанилүү роль ойногонун айтты.