Байден-Зеленский жолугушуусу...

Америка Кошмо Штаттарынын (АКШ) президенти Жо Байден менен Украинанын президенти Владимир Зеленский Японияда өткөн G7 саммитинин алкагында жолугушту.

Жолугушууда Украинага ок-дары жана бронетранспорт каражаттарын камсыздай тургандарын билдирген Байден 375 миллион долларлык жаңы аскердик жардам пакетин да жарыялап: «Украинанын артындабыз жана эч жакка кетпейбиз»,-деди.

Байден ошондой эле Чоң жетиликтин лидерлер саммитинен кийин өткөргөн маалымат жыйынында АКШнын Украинага F-16ларды жеткирүү планына байланыштуу Украинанын азыр бул учактарга муктаж экенин айтты.

Журналисттин Украина бул согуштук учактарды Орусияга кол салуу үчүн колдонобу же жокпу деген суроосуна Байден: «Мен Зеленскийден алар F-16ларды Орусиянын аймагына кирүү үчүн колдонбой турганы боюнча бекем кепилдик алдым. Бирок алар Украинанын территориясында орустар турган жерде аларды колдоно алышат»,-деп жооп берди.

Зеленский болсо Твиттерде Байден менен Чоң жетиликтин саммитинин алкагында жолукканын бөлүшүп, Байденге АКШнын Украинага берген 37 миллиард долларлык каржылык жана 375 миллион долларлык аскердик жардамына ыраазычылык билдирип: «Биз эч качан унутпайбыз»,-деп айтты.

Зеленский: «Биз өлкөбүздүн коргонуу жөндөмдүүлүгүн чыңдоо боюнча мындан аркы кызматташууну, Украинанын Тынчтык формуласын ишке ашырууну, Украинаны реконструкциялоо жана жакшыртуу долбоорлорун талкууладык»,-деди.