Европолдон жасалма дары операциялары

Европа Биримдигинин полиция уюмунун (Европол) координациясында 28 өлкөдө жүргүзүлгөн «жасалма дары» жана «допинг зат» операцияларында 349 киши кармалып, 10,5 миллиондон ашуун жасалма дарынын колго түшүрүлгөнү маалымдалды.

Европолдун жазуу түрүндөгү билдирүүсүндө, 2022-жылдын апрель-октябрь айлары аралыгында жасалма дары жана допинг заттарын чыгарган 59 кылмыштуу уюмга карата жүргүзүлгөн операцияларда 349 кишинин кармалганы белгиленди.

Операцияларда рынок баасы 40 миллион евродон ашкан 10,5 миллиондон ашуун жасалма дары жана допинг заттары колго түшүрүлдү.

Дарылар өндүрүлгөн 10 мыйзамсыз лаборатория жабылган операцияларда ошондой эле 1 миллион жасалма Ковид-19 тесттинин колго түшүрүлгөнү кабарланды.

Европанын контрабандага каршы бюросу (OLAF), Дүйнөлүк антидопинг агенттиги (WADA) жана Дүйнөлүк бажы уюму (WCO) тарабынан колдоого алынган операцияларда Европа Биримдигине мүчө 19 өлкөнүн коопсуздук күчтөрүнөн тышкары, Албания, Босния- Герцеговина, Колумбия, Грузия, Исландия, Түндүк Македония, Сербия, Швейцария жана Америка Кошмо Штаттарынын (АКШ) коопсуздук бөлүктөрү да тартылып, бул өлкөлөрдө 195 соттук иликтөө жүргүзүлгөнү айтылды.

Жасалма дарылардын Европада күчөгөн социалдык көйгөйгө айланганын белгилеген Europol, аталган кылмыштан түшкөн кирешенин баңги соодасынан алынган кирешеге жакын экенине көңүл бурду.