Индиянын Чандраян-2 аппараты Айдын орбитасында

Индиянын учкучсуз космостук кемеси Чандраян-2 Айдын орбитасында айлана баштады.

Космостук изилдөө уюму дээрлик бир ай мурда Жерден учуп кеткен Чандраян-2 кемесин Айдын орбитасына киргизе алгандарын билдирди.

Чандраян-2нин Айдын бетине 100 чакырым жакындаганга дейре орбитада айлануусун уланта турганы белгиленди.

Бул аралыкка жеткенден кийин Чандраян-2нин дөңгөлөктүү аппаратынын 7-сентябрда Айдын түштүк уюлунда эки кратердин ортосундагы жайык түздүккө кондурулушу пландалып жатат.

Бул аппараттын ал жерде 100 миллион тонна суу бар экендиги божомолдонгон кратерлерди иликтеши күтүлүүдө.

Индия алгач Чандраян-1 кемесин 2008-жылы Айга учуруп, 2014-жылы да Марстын орбитасына спутник жайгаштыра алган болчу.