Жаңа виза түрлері енгізіледі

Мемлекет басшысы Қасым-Жомарт Тоқаевтың биылғы 1 қыркүйектегі Қазақстан халқына Жолдауында елдің көші-қон саясатының тиімділігін арттыру бойынша жаңа шаралардың пакеті ұсынылды. Оларды іске асыру мақсатында көші-қон саясатының алдағы 5 жылға арналған жаңа тұжырымдамасы шеңберінде Қазақстанда шетелдіктер үшін ерекше жағдайды көздейтін бағалы дағдылар мен инвестициялық виза үшін арнайы визалар енгізу көзделеді.

Жаңа тұжырымдама шеңберінде Қазақстан үшін тапшы және жиі кездесетін кәсіптер бойынша 100 үздік шетелдік маманды тартудың тетігі көзделеді.

Бұл кәсіби мамандардың міндеті  білім трансфері және өндірісте жұмыс істейтін қазақстандықтарды даярлау болады.

Олар үшін тұруға ықтиярхаты бар «Бағалы дағдыларға арналған виза» енгізіледі және қазақстандық кадрларды  даярлау үшін үнемі жаңартылып отыратын бағалы дағдылар рейтингі (тапшы кәсіптер мен мамандықтар) жасалады.

Сондай-ақ Мемлекет басшысының тапсырмасын іске асыру аясында жаңа тұжырымдама жобасында бизнес-иммиграция тәсілдері өзгертіледі.

ЭЫДҰ елдерінің тәжірибесін негізге ала отырып, Қазақстан экономикасына бір мезгілде 300 мың АҚШ долларын инвестициялаған шетелдік бизнесмендер үшін инвестициялық және іскерлік визалар алу шарттарын қайта қарау ұсынылады.

«Инвестициялық виза» бойынша 10 жыл тұруға рұқсат береді. Виза иесі бизнесті тіркеуге, мүлікке иелік етуге, қаржы операцияларын жүргізуге мүмкіндік алады.

Бұдан басқа білім иммиграциясын дамыту мақсатында тұжырымдамада мыналар көзделеді:

- шетелдік жетекші білім мекемелерін академиялық ұтқырлық бағдарламасына тарту және қос дипломды білім беру практикасын одан әрі дамыту арқылы елдік білім беру инфрақұрылымын кеңейту;

- сұранысқа ие мамандықтар бойынша 100 үздік оқытушыны және сұранысқа ие технологиялар бойынша ғалымдарды тарту.

Бұл ретте шетелдік ғалымдар мен оқытушылар үшін тұруға ықтиярхат, ал кейіннен Қазақстан азаматтығын алу құқығын бере отырып, ұзақ мерзімді (10 жылға дейін) «Ғылыми-педагогикалық визалар» болады.

Дереккөз: İnform.kz