ირანში წყალდიდობას 2 მაშველიც ემსხვერპლა

ირანის ჩრდილო-აღმოსავლეთში წყალდიდობით დაზარალებულ გულისტანის პროვინციაში ნავი გადაბრუნდა, რომელზეც დამხმარე ჯგუფი იმყოფებოდა. პირველადი მონაცემებით 2 ადამიანი დაიღუპა, 3 კი დაიკარგა.

ირანის საინფორმაციო სააგენტო ISNA-სთან საუბარში გულისტანის პროვინციის გუმუშანის რაიონის გამგებელმა განაცხადა, რომ გუშინ ღამის საათებში გადაბრუნდა ნავი, რომელზეც წყალდიდობით დაზარალებულებისათვის დახმარების გამწევი ჯგუფი იმყოფებდა.  

მისივე თქმით, ჯერ-ჯერობით ვერ დაადგინეს ნავზე ზუსტად რამდენი ადამიანი იმყოფებოდა.

„ამ დრომდე 17 ადამიანი გადაარჩინეს თუმცა სამწუხაროდ, წყლიდან 2 ადამიანის ცხედარი ამოიღეს. 3-4 ადამიანი დაკარგულია.“- აღნიშნა გუმუშანის რაიონის გამგებელმა.

ირანის ჩრდილოეთში, ჩრდილო-დასავლეთში, სამხრეთსა და სამხრეთ-დასავლეთში გასული კვირიდან დღემდე ძლიერმა წვიმებმა მდინარეებისა და ღელეების ადიდება და მათ მიერ ჯებირებისა და ხიდების დანგრევა, ასობით სახლის დატბორვა გამოიწვია. ქვეყნის 25 შტატში მომხდარი წყალდიდობის შედეგად 23 ადამიანი დაიღუპა.