ბლინკენმა Bloomberg-ის ეთერში აქტუალური საკითხები შეაფასა

ამერიკის შეერთებული შტატების სახელმწიფო მდივანმა ენტონი ბლინკენმა განაცხადა, რომ საუდის არაბეთის მხარდაჭერა გაერთიანებული ერების ორგანიზაციაში რეზოლუციებისთვის, რომლებიც გმობს რუსეთს და მისი ჰუმანიტარული დახმარება უკრაინისთვის არ ანაზღაურებს ნავთობის ექსპორტიორი ქვეყნების OPEC+-ის გადაწყვეტილებას ნავთობის წარმოების შემცირების შესახებ.

ბლინკენმა სატელევიზიო არხის Bloomberg-ის ეთერში აქტუალური საკითხები შეაფასა.

OPEC + ჯგუფის ნავთობის წარმოების შემცირების გადაწყვეტილებაში როლის გამო აშშ-ის მიერ საუდის არაბეთთან ურთიერთობების გადახედვის თაობაზე განცხადებასთან დაკავშირებით დასმულ შეკითხვაზე ბლინკენმა უპასუხა, რომ ორ ქვეყანას შორის ურთიერთობა ათწლეულების განმავლობაში აშენდა სხვადასხვა ლიდერების და მთავრობების მიერ აშშ-ის მრავალი ინტერესის გათვალისწინებით და ამის გათვალისწინებით განიხილავენ კონგრესთან ორ ქვეყანას შორის არსებულ ურთიერთობებს.

ბლინკენის თქმით, მათ ღიად განაცხადეს, რომ OPEC+ ის გადაწყვეტილება მცდარი იყო და რომ ამ გადაწყვეტილებამ გაზარდა რუსეთის ენერგეტიკაზე დაფუძნებული შემოსავლები და ხელი შეუწყო გლობალური ინფლაციის ზრდას იმ დროს, როდესაც მსოფლიოში ეკონომიკამ გაუმჯობესება დაიწყო ახალი ტიპის კორონავირუსის პანდემიის შემდეგ.

ამერიკელმა მინისტრმა ასევე თქვა: „საუდის არაბეთმა მხარი დაუჭირა გაეროს მნიშვნელოვან რეზოლუციებს, რომლებიც გმობს რუსეთის აგრესიას... საუდის არაბეთმა უკრაინისთვის ჰუმანიტარული დახმარების სახით 400 მილიონი დოლარი გამოყო. ანუ ეს არის პოზიტიური მოვლენები. ეს არ ანაზღაურებს OPEC+ ჯგუფის წარმოების საკითხზე მიღებულ გადაწყვეტილებას, მაგრამ ჩვენ ამას ვითვალისწინებთ“.