Türkiyә Bağdadda vә Burkina-Fasoda törәdilәn terror aktlarını qınadı
Xarici İşlәr Nazirliyi törәdilәn terror aktları ilә bağlı açıqlama verib.
Türkiyә İraqın paytaxtı Bağdaddakı mәsciddә törәdilәn terror aktını qınayıb.
Türkiyә Xarici İşlәr Nazirliyindәn verilәn açıqlamada bu ifadәlәrә yer verilib: ‘‘İraqın paytaxtı Bağdaddakı mәsciddә cümә namazı zamanı törәdilәn terror aktı nәticәsindә çox sayda adamın yaralanması vә hәlak olması ilә bağlı xәbәr bizi kәdәrlәndirdi. Bu xain hücumu sәrt şәkildә qınayırıq. Dost vә qardaş İraq xalqına başsağlığı, hәlak olanlara Allahdan rәhmәt, xәsarәt alanlara şәfa dilәyirik. Türkiyә İraqın terrora qarşı apardığı mübarizәyә dәstәk vermәyә davam edәcәk’’.
Qeyd edәk ki,İraqın paytaxtı Bağdadda cümә namazı zamanı bir mәscidә tәşkil edilәn hücum nәticәsindә 10 nәfәr hәlak olub, 30 nәfәr dә xәsarәt alıb. Bağdadın cәnubundakı Әl-Muntazar mәscidinә daxil olan terrorçu-kamikadze üzәrindәki partlayıcı qurğunu işә salıb.
Xatırladaq ki, Bağdadda uzun zamandır buna bәnzәr hadisәlәr yaşanmırdı.
Türkiyә hәmçinin Burkina-Fasonun şimalında törәdilәn terror aktını da qınayıb.
Türkiyә Xarici İşlәr Nazirliyindәn verilәn açıqlamada bu ifadәlәrә yer verilib: ‘‘Burkina-Fasonun Belehede kәndindә törәdilәn terror aktı nәticәsindә çox sayda adamın hәlak olması ilә bağlı xәbәr bizi kәdәrlәndirdi. Bu xain hücumu sәrt şәkildә qınayırıq, qardaş Burkina-Faso xalqına vә hökumәtinә başsağlığı veririk, hәlak olanlara Allahdan rәhmәt dilәyirik’’.
