İbrahim Kalın:‘‘2016-cı ildә çox qan axdı’’
Türkiyə Prezident Aparatının sözçüsü İbrahim Kalının “Daly Sabah” qəzetində yer tutan məqaləsi
2016-cı il dünya üçün kәdәr dolu il oldu. Qlobal terrorizm, vәtәndaş müharibələri, qaçqın böhranı, məzhəb münaqişələri, geosiyasi güc aksiyaları, böyüyən iqtisadi bərabərsizlik və beynəlxalq ictimaiyyәtin qlobal problemlәr qarşısındakı uğursuzluğu, məsum həyatların tənəzzülə uğramasına, yoxsulların və əzilənlərin öz talelərinə tərk edilməsinә sәbәb oldu.
Әgәr 2017-ci ildә belә hadisәlәrin yaşanmamasını istәyiriksә insan heysiyyәtini qorumaqla işә başlamaq mәcburiyyәtindәyik.
Hazırda beynәlxalq sistem müәyyәn müddәtdir çöküb. BMT-nin sistemi işləmir. Təcili islahata ehtiyacı olmasına baxmayaraq BMT Təhlükəsizlik Şurasının daimi üzvləri bunu müzakirə etmək belə istəmirlər. Bəzi BMT orqanları yaxşı şeylər edirlər, amma bu hər zaman BMT bürokratiyası tərəfindən məhdudlaşdırmağa məruz qalır və lazımi ehtiyacların ödənilməsinə kifayәt etmir.
ABŞ və Avropa, transatlantik alyansını ayaqda tutan bu iki sütun Suriya müharibəsi, İraqdakı xaos, qaçqın böhranı, Ukraynadakı qarşıdurmalar, qlobal terrorizm, kiber təhlükəsizlik, artan irqçilik, İslamafobiya və digər bir çox problemin qarşısını almaqda uğursuz oldu.
Digər tərəfdən Avropa gәlәcәyi görmәkdә çәtinlik çәkir. Elan edilməmiş bir prinsip olaraq Avropa paytaxtları heç bir əhəmiyyətli strateji qərarı Vaşinqtonun dəstəyi və liderliyi olmadan almırlar. Ötən son səkkiz il ərzində Obama rəhbərliyinin həyata keçirdiyi çox vaxt əsassız və qeyri-səmimi siyasəti nəzərə aldıqda qlobal təhlükəsizlik vəziyyəti bütün müttəfiqlərin zərərinə olacaq şəkildə pisləşmişdir.
Trump rəhbərliyinin bu münasibәtlәri necə müzakirə edəcəyini və qlobal güc tarazlığı yenidən qurularkən necə bir təsirinin olacağını birlikdə görəcəyik.
Digər tərəfdən gәlәcәyi görmә və liderlik çatışmazlığı həmçinin Avropa İttifaqının Türkiyənin üzvlük prosesinə necə yanaşdığı, Schengen viza tətbiqinin aradan qaldırılması və Türkiyə-Aİ arasında әldә olunan miqrasiya müqaviləsi kimi mövzularda da aydın hal almışdır.
PKK, DAİŞ və Gülençi Terror Tәşkilatının (FETÖ) ölkənin sülh və sabitliyinə qarşı yaratdığı təhlükəsizlik təhdidlərini görməməzlikdən gələn Aİ bir tərəfdən Türkiyəyə demokratiya dərsi verməklə məşğuldu, digər tərəfdən terroru dәstәklәyәnlәrә Avropanın qəlbində böyük mövcudluq yaratmaları üçün icazə vermiş lakin qaçqınlara laqeyd qalmışdı.
2017-ci ildә bir çox Avropa ölkəsi artan irqçilik, qaçqın düşmәnçiliyi və islamofobik qrupların olduğu dövrdә seçkilәr keçirilәcәk.
Türkiyə 2016-ci ildә FETÖ-nun İyulun 15-dә hәyata keçirdiyi dövlət çevrilişi cəhdini və DAİŞ və PKK-nın artan terror hücumlarının dəhşətli xatirəlәrini geridə qoyur.
Türkiyənin Qərbli və NATO müttəfiqləri bu terror təhdidlərinә qarşı Türkiyənin yanında güclü şəkildə dayanmadılar. Məsələ qlobal terrorizm oluqda İstanbul, Ankara, Bağdad, İslamabad, Paris, Nitse ya da Brüssel arasında bir fərq olmur. Buna baxmayaraq Türkiyə PKK terrorizminə qarşı mübarizədə avropalı dostlarından tam dəstək görməyib. PKK casusları Avropa şəhərlərində rahatca gəzmiş, pul toplamış, özünə yeni üzvlər toplamış, təbliğat apara bilmiş və hətta milli məclislərə dəvət edilmişlər. PKK Aİ tərəfindən terror təşkilatı kimi qәbul olunmasına baxmayaraq Avropa ölkələri PKK-ya terror tәşkilatı kimi yanaşmırlar. Bundan başqa Türkiyənin son on il ərzində Kürd vətəndaşları üçün etdiklərini görməməzlikdən gələrək bunun əvəzinə PKK-nın Kürd xalqının tələbləri kimi təqdim etdiyi təbliğat sözlərinə inanmağa üstünlük verirlәr.
Türkiyənin Suriyadakı DAİŞ-ә qarşı apardığı ‘‘Fərat Qalxanı’’ әmәliyyatına da ABŞ rәhbәrliyindәki koalisiya qüvvәlәri lazımi dəstəyi verməyib. Bunun əvəzinə Obama rəhbərliyi PKK-nın Suriyadakı qolu YPG- ni dəstəkləməyə və silahlandırmağa davam edir.
Bütün bunlara baxmayaraq Türkiyə şərqi Hələbdən 45 min nəfərin İdlibә tәxliyyә edilmәsini tәmin etmişdir.
2016-cı ilin son günlərinin yəqin ki, ən əhəmiyyətli və gələcək vəd edən xəbəri isə Rusiya-Türkiyə rәhbәrliyindә dekabrın 30-da bütün Suriya әrazisindә qüvvәyә minәn atəşkəs müqaviləsi olub. Bu müqavilə Suriya rejimi və müxalifәt nümayəndələrinin bir araya gələrək 6 ildir davam edən Suriya müharibəsinə siyasi həll yolu tapmaq üçün Astanada keçirilәcәk danışıqlar üçün lazım olan zəmini hazırlayacaq.
Astana prosesi BMT rəhbərliyindəki Cenevrə danışıqlarını əvəz etməkdən daha çox onu tamamlaması üçün nəzərdə tutulmuşdur.
Әlaqәli Xәbәrlәr
Şərqi Qüds və İordan çayının qərb sahilində vəziyyət get-gedə pisləşir
BMT-nin İnsan Haqları üzrə ali komissarı Volker Türk toplantıda çıxış edərək deyib ...