yemende b d t heyitige oq chiqirildi

türkiye awazi radiyosi xewiri: b d t bash katipining bayanatchisi yemende b d t urush toxtitishni tekshürüsh heyitige oq chiqirilghanliqi toghrisida bayanat élan qildi.

bayanatta, général patrik kamaért we uning hemrahliqidiki heyetke oq chiqirilghanliqi bildürüldi we «xelqaraliq urush toxtitishni tekshürgüchilerning bixeter ikenliki» eskertildi.

yemen hökümiti bilen husiylar otturisida shiwétsiye paytexti stokholimda ötküzülgen uchrishishlardin kéyin tüzülgen kélishimdin kéyin, urush toxtitishni tekshürüsh üchün hudeydege puqrache kiyingen we qoralsiz xelqaraliq 20 közetküchi ewetilgen idi.

b d t xewpsizlik kéngishi közetküchiler sanini 75 ke chiqirishni, hudeyde, salif we ras isa portlirigha alte ayliqtin orunlashturushni qarar qilghan idi.

husiylar bilen yemen hökümiti 2018-yili 6-dékabir bashlinip 13-dékabir axirlashqan muzakirelerdin kéyin, yemen xelqi üchün hayatiy ehmiyetke ige hudeyde porti we shehiri üchün tereplerning kélishim hasil qilghanliqini élan qilghan idi. hudeyde we etrapi üchün hasil qilinghan kélishim 18-dékabirdin tartip ijra qilinghan idi.

b d t ning melumatlirigha asaslanghanda, eng éghir insaniy kirizislardin biri yüz bergen yemende, nopusning yérimini igileydighan 14 milyon kishi acharchiliqqa duch kelgen. 22 milyondin artuq kishi insanperwerlik yardimige we qoghdashqa éhtiyajliq iken.

nurghun sahelerde insaniy kirizis yüz bergen yemende, ichmlik suning yétishmesliki, ozuqluq yétishmeslik, dora we tibbiy eslihelerning kemchiliki qatarliq sewebler tüpeylidin xoléra qatarliq yuqumluq késellékler künséri köpeymekte iken.

hudeyde porti yemende yémek-ichmek mehsulatlirining texminen %90 i, insanperwerlik yardemlirining %80 ining yetküzülüsh nuqtisi bolush sewebidin, yemen xelqi üchün hayatiy ehmiyetke ige.

yemende töt yildin artuq dawam qilghan ichki urushta minglarche kishi jénidin ayrildi. dunyadiki eng kembeghel döletlerning biri bolghan we uzun waqittin buyan siyasiy muqimsizliq hökümran bolghan yemende, husiylar 2014-yil séntebirdin buyan paytext sanaa we bezi rayonlarning kontrolluqini qoligha kirgüzdi.

seudi erebistan bashchiliqidiki xelqaraliq birleshme qisim 2015-yil mart éyidin bashlap husiylargha qarshi yemen hökümitini qollap kelmekte.