putin dölet mudapie ministirini wezipisidin qaldurdi
rusiye pirézidénti wladimir putin dölet mudapie ministiri sérgéy shoyguni wezipisidin élip tashlidi. uning ornigha sabiq muawin bash ministir andréy bélowsowni wezipige teyinleshni teklip qildi.
türkiye awazi radiyosi xewiri: rusiye parlaméntining yuqiri qaniti hésablinidighan fédératsiye kéngishi bayanat élan qilip, putinning özining hoquq dairiside ministirlarni wezipige teyinlesh üchün békitken kishilerning tizimlikini parlaméntqa sunghanliqini bildürdi.
u tashqi ishlar ministirliqigha hazirqi ministir sérgéy lawrowni, dölet mudapie ministirliqigha sabiq muawin bash ministir andréy bélowsowni teklip qildi.
u qararname chiqirip, rusiye fédératsiye xewpsizlik kéngishining bash katipi nikolay patrushéwni wezipisidin qaldurup, uning ornigha sérgéy shoyguni teyinlidi.
putin teripidin 2012-yili dölet mudapie ministirliqigha wezipige teyinlengen sérgéy shoygu, rusiye armiyesini 2015-yili térrorluq teshkilati daéshqa qarshi küresh qilishni seweb körsitip, süriyede urushqa saldi we süriyediki herbiy heriketlerge yétekchilik qildi. ukraina-rusiye urushi bashlanghan 2022-yili 24-féwraldin tartip herbiy qisimlarni özi bir qolluq bashqurdi.
sérgéy shoygu aldinqi septe hakimiyetke qarshi isyan kötürgen we olturghan ayropilanning «chüshüp kétishi» bilen jénidin ayrilghan yallanma eskerler guruhi wagnérning qurghuchisi prigozhinning küchlük tenqidige uchrighan idi.
fédératsiye kéngishi 14-mayghiche putin teripidin sunulghan ministir we xewpsizlik kéngishi namzatlirigha qarap chiqidu.
putin yéngi hökümet teshkilleshte tashqi ishlar ministiri, dölet mudapie ministiri, edliye ministiri, jiddiy ishlargha taqabil turush ministiri we ichki ishlar ministirini, rusiye fédératsiyesining yuqiri qaniti bolghan fédératsiye kéngishi bilen muzakire qilghan halda parlaméntning töwen qaniti dumaning testqidin ötküzmey turup wezipige teyinlesh hoquqigha ige.
