amérika irangha jawab qayturdi
amérikining birleshken döletler teshkilatida turushluq daimiy wekili niki héyli iranning yadro kélishimini dunyani görüge éliwélish üchün ishlitishige ruxset qilimasliqni éytti.
türkiye awazi radiyosi xewiri: héyli bu heqte élan qilghan yazma bayanatida, iran pirézidénti hesen ruhanining: «amérikining yéngi rehberliri yadro kélishimi hasil qilinishtin burun émbargo yürgüzüsh we bésim siyasitini yolgha qoyushqa niyet qilsa, bizmu derhal heriketke ötüp, kélishimdin burunqi ehwalgha qaytishtin qilche ayanmaymiz» teriqisidiki sözlirige jawab qayturdi.
amérikining irangha qarshi yéngi émbargo yürgüzüshni qarar qilghanliqini eskertken héyli, émbargo yürgüzüsh qararining, iranning dunyaning herqaysi jaylirida térrorizmgha yardem bérishi, qoral - yaragh etkeschiliki, ighwagerchilik tüsini alghan bashqurulidighan bomba pirogrammisi we kishilik hoquq depsendichilikiri sewebidin chiqirilghanliqini ilgiri sürdi.
bu émbargolarning iran bilen 1+5 (amérika, firansiye, engliye, gérmaniye, xitay we rusiye) döletliri hasil qilghan yadro kélishimi bilen munasiwitining yoqluqini qeyt qilghan héyli: «iranning yadro kélishimini dunyani görüge éliwélish üchün ishlitishige ruxset bérilmesliki, herqandaq ehwal astida yadro qorallirigha ige bolushigha yol qoyulmasliqi lazim. shuning bilen bir waqitta, bashqurulidighan bomba qoyup bérishi, térrorizmgha yardm bérishi, kishilik hoquq depsendichilikliri we birleshken döletler teshkilati xewpsizlik kéngishining qararlirigha xilapliq qilishi sewebidin irandin dawamliq hésab élishimiz kérek» dédi.
héylining kéler hepte wiyanagha bérip, xelqara atom énérgiyesi orginini ziyaret qilidighanliqi we bu yerde iranning yadro paaliyetliri heqqide söhbet élip baridighanliqi bildürüldi.
amérika pirézidénti tramp mushu ayning bashlirida rusiye, iran we shimaliy koréyege qaritilghan yéngi émbargolarni öz ichige alghan qanun teklipini maqullighanidi.
