ترکی: یونان کا فیصلہ شرمناک ہی نہیں غیر قانونی بھی ہے

ترکی کے وزیر داخلہ سلیمان سوئے لُو نے کہا ہے کہ مہاجرین کے بارے میں یونان کا فیصلہ شرمناک  ہی نہیں غیر قانونی بھی ہے۔

سلیمان سوئے لُو نے یونان کے ایک ماہ تک پناہ کی نئی درخواستیں قبول نہ کرنے سے متعلق فیصلے پر تنقید کی ہے۔

ٹویٹر سے جاری کردہ بیان میں سوئے لُو نے کہا ہے کہ "یونان نے ایک ماہ تک پناہ کی نئی درخواستیں قبول نہ کرنے کا اعلان کیا ہے۔ اقوام متحدہ  مہاجرین ہائی کمشنر دفتر کی طرف سے جاری کئے گئے بیان کے مطابق 1951  کے جنیوا سمجھوتے اور یورپی یونین  کے مہاجر قانون کی رُو سے ایسا فیصلہ نہیں کیا جا سکتا۔ یہ فیصلہ صرف شرمناک ہی نہیں غیر قانونی بھی ہے"۔

اس دوران وزیر داخلہ سلیمان سوئے لُو نے ترکی سے نکلنے والے مہاجرین کی تعداد کا بھی اعلان کیا ہے۔

انہوں نے کہا ہے کہ ترکی کے مقامی وقت کے مطابق صبح 9 بجے سے اب تک ترکی سے نکل کر یونان کی طرف جانے والے مہاجرین کی تعداد ایک لاکھ 35 ہزار 8 سو 44 ہو گئی ہے۔