ترک مسلح افواج کے سربراہ کی پاک فوج کے حکام سے ملاقاتیں

ترک مسلح افواج کے سربراہ جنرل خلوصی  آقار نے پاکستان کے سرکاری دورے کے دوران چیئرمین جوائنٹ چیف آف سٹاف کمیٹی جنرل زبیر محمود حیات سے جوائنٹ سٹاف ہیڈ کوارٹرز راولپنڈی میں ملاقات کی۔

 پاک فوج کے شعبہ تعلقات عامہ کے مطابق اس ملاقات میں باہمی دلچسپی کے امور، عسکری روابط، علاقائی سلامتی اور باہمی تعاون بڑھانے پر تبادلہ خیال کیا گیا۔

اس موقع پر ترک چیف نے مسلح افواج کی پیشہ ورانہ مہارت کو سراہا اور دہشت گردی کے خلاف پاکستان کی قربانیوں کا اعتراف کیا۔ ان کا کہنا تھا کہ خطے میں امن قائم کرنے میں پاک آرمی کا بہت بڑا کردار ہے۔ آرمی چیف جنرل قمر جاوید باجوہ نے ترکش چیف کا شکریہ ادا کرتے ہوئے کہا کہ ترکی نے ہر معاملے میں اپنے برادر ملک پاکستان کا ساتھ دیا۔ قبل ازیں جوائنٹ سٹاف ہیڈ کوارٹرز راولپنڈی آمد پر جنرل خلوصی  آقار کو مسلح افواج کے چاق و چوبند دستے نے گارڈ آف پیش کیا۔