ترک سائنس دان کورونا وائرس ویکسین کی تیاری کے پہلے مرحلے میں کامیاب
ہم نے SARS-COV-2 وائرس کی آئسولیشن میں کامیابی حاصل کر لی ہے: پروفیسر ڈاکٹر آئیقُت اوزقُل
ترکی انقرہ یونیورسٹی بائیو ٹیکنالوجی انسٹیٹیوٹ کے ڈائریکٹر پروفیسر ڈاکٹر آئیقُت اوزقُل نے کورونا وائرس کےسیرم، ویکسین اور دوا کی تیاری کے پہلے مرحلے یعنی SARS-COV-2 وائرس کی آئسولیشن میں کامیابی کا اعلان کیا ہے۔
انقرہ یونیورسٹی کے ٹویٹر پیج سے جاری کردہ بیان میں پروفیسر ڈاکٹر آئیقُت اوزقُل نے علاج کی تیاری سے متعلق جاری تحقیقی کاروائیوں کے بارے میں معلومات فراہم کی ہیں۔
انہوں نے کہا ہےکہ وائرس کے علاج کے لئے ہم نے SARS-COV-2 وائرس کی آئسولیشن میں کامیابی حاصل کر لی ہے اور یہ سیرم، ویکسین اور دوا کی تیاری کا پہلا مرحلہ ہے۔
انقرہ یونیورسٹی کے ریکٹر پروفیسر ڈاکٹر ایرکان اِبیش نے بھی ٹویٹر سے جاری کردہ بیان میں کہا ہے کہ " میں اپنے ساتھیوں کو مبارکباد پیش کرتا ہوں اور امید کرتا ہوں کہ یہ مرحلہ کامیابی سے آگے بڑھے گا"۔
واضح رہے کہ ویکسین کی تیاری کا کام بائیوٹیکنالوجی انسٹیٹیوٹ اور ویٹرنر فیکلٹی ویرولوجی لیبارٹریوں میں جاری ہے۔