پولیو کے خاتمے کے لئے عمران خان کی کوششوں کی تعریف
بل گیٹس نے عمران خان کو خیبر پختونخوا میں صحت کے منصوبوں کی نگرانی کے لئے جدید سیٹلائٹ سسٹم فراہم کرنے کی پیشکش کی ہے ۔
مائیکرو سافٹ کے بانی بل گیٹس نے تحریک انصاف کے چیئرمین عمران خان کو خیبر پختونخوا میں صحت کے منصوبوں کی نگرانی کے لئے جدید سیٹلائٹ سسٹم فراہم کرنے کی پیشکش کی ہے ۔ انھوں نے عمران خان کو لکھے گئے خط میں صوبہ خیبر پختونخوا میں پولیو سمیت دیگر بیماریوں کے خاتمے کے لئے عمران خان کی کوششوں کی تعریف کرتے ہوئے کہا کہ پولیو کے خاتمے کا عزم رکھتے ہیں جسے دیکھ کر ہماری حوصلہ افزائی ہوئی ہے ۔ پولیو کا خاتمہ انسانیت کے لئے بہت بڑی ترجیح ہے ۔ انہوں نے کہا کہ یہ بات خوش آئند ہے کہ وفاقی، صوبائی حکومتیں اور مسلح افواج ‘‘صحت کا اتحاد’’ پروگرام کے تحت کام کر رہی ہیں ۔ ہم خیبر پختونخوا میں صحت کے منصوبوں کی موثر نگرانی کے لئے جدید ترین سیٹلائٹ ٹیکنالوجی فراہم کرنا چاہتے ہیں اس کی مدد سے ڈاکٹروں،اور ہسپتالوں کی بروقت اور موثر نگرانی ہوسکتی ہے ۔بل گیٹس نے اپنے خط میں مزید کہا کہ آپ کی براہ راست نگرانی پاکستان سے پولیو کے خاتمے کیلئے ضروری ہے ۔ آپ کی چیف سیکریٹری اور وزیر اعلیٰ پرویز خٹک سے بات چیت پولیو کے خاتمے کی مہم چلانے میں مددگار ثابت ہوگی ۔ ڈاکٹر وقار اجمل کو اس موضوع پرآپ سے بات کرنے کی ذمہ داری سونپی گئی ہے۔