مانگالیان کی طرف سے سرخ سیارے کی مسحور کن تصویر

بھارت کی مریخ کے مدار میں بھیجی گئی پہلی خلائی گاڑی نے سرخ سیارے کی تصویر زمین پر بھیجی ہے کہ جس میں مریخ کا منظر پول سے لے کر پول تک دکھائی دے رہا ہے۔

بھارت کی اسپیس ریسرچ آرگنائزیشن ISRO کی طرف سے خلائی گاڑی مانگالیان کی بھیجی ہوئی اس نئی تصویر کو آج نشر کیا گیا ہے۔
تصویر میں مریخ خلاء میں ایک سرخ کُّرے کی طرح دکھائی دے رہا ہے۔ سیارے کی جنوبی آئس کیپ واضح دکھائی دے رہی ہے جبکہ شمال میں دھول کے گہرے جھکڑ نظر آ رہے ہیں۔ جن کے بارے میں ISRO کے حکام نے مریخ آربٹر کے لئے اپنے ٹویٹر پیغام میں یوں لکھا ہے "یہاں کوئی چیز اُبل رہی ہے"۔
مانگالیان خلائی گاڑی نے 46292 میل کے فاصلے سے سیارے کی یہ مسحور کن تصویر اپنے مارس کلر کیمرہ سے 28 ستمبر بروز اتوار کو اتاری ہے۔ جب سے خلائی گاڑی مریخ کے مدار میں پہنچی اس کی طرف سے زمین پر بھیجی گئی یہ تیسری اور بہترین تصویر ہے۔
واضح رہے کہ گذشتہ ہفتے بھارت کی خلائی گاڑی مانگالیان کامیابی سے مریخ کے مدار میں پہنچ گئی تھی۔