ڈیموکریٹک جمہوریہ کانگو میں ایبولا وائرس کی نشاندہی

ڈیموکریٹک جمہوریہ کانگو کے وزیر صحت فیلیکس کوبانگے نے اعلان کیا ہے کہ ایبولا وائرس جمہوریہ کانگو کے شمالی علاقے ایکویٹر میں بھی پھیل گیا ہے ۔اس علاقے میں اس سے قبل 70 افراد ہلاک ہو گئے تھے مگر صحت کی عالمی تنظیم نے ان افراد کے کسی دوسری بیماری سے ہلاک ہونے کا اعلان کیا تھا۔انھوں نے کہا کہ حالیہ چند روز میں8 مریضوں میں سے دو میں ایبولا وائرس پایا گیا ہے ۔
صحت کی عالمی تنظیم نےاعلان کیا ہے کہ مغربی افریقہ میں اس وائرس کے پھیلاو کو روکنے کے لیے ضروری تدابیر اختیار کر لی گئی ہیں لیکن افریقہ اور بعض علاقوں میں اس مرض میں مبتلا ہونے والے افراد ہسپتال جانے کے بجائے اپنےگھروں میں رہنے کو ترجیح دیتے ہیں ۔
لیبریا،گینی اور سیرالیون میں 1400 افرادایبولا وائرس کیوجہ سے ہلاک ہو چکے ہیں۔ لیبریا،گینی اور سیرالیون سے آنے والی پروازوں پر پابندی لگا نے والے آئی وری کوسٹ نے اب ان ممالک کیساتھ اپنی سرحدوں کو بھی بند کر دیا ہے ۔ایبولا وائرس پر قابو پانے کے لیے علاج دریافت کرنے کے لیے عالمی سطح پر کوششیں جاری ہیں لیکن زیڈ ایم اے پی پی نامی علاج کے استعمال سے بعض مریض صحت یاب ہو چکے ہیں ۔