کشمیرمیں اب تحریکِ آزادی کو نہیں دبایا جاسکتا، مسئلہ کشمیر اب دنیا کے ایجنڈےپر ہے: فردوس عاشق اعوان

معاون خصوصی برائے اطلاعات فردوس عاشق اعوان کا کہنا ہے کہ عالمی برادری اب مقبوضہ کشمیر میں بھارتی فورسز کی جانب سے ڈھائے جانے والے مظالم اور انسانی حقوق کی خلاف ورزیوں پر کھل کر بات کر رہی ہے اور اس سلسلے  میں کشمیریوں کی کی حمایت کررہی  ہے۔

انہوں نے کہا کہ تحریک انصاف کی حکومت نے موثر خارجہ پالیسی کے ذریعے مسئلہ کشمیر کو بین الاقوامی سطح پر اٹھایا ہے اور بھارت کا فسطائی چہرہ دنیا کے سامنے بے نقاب ہوگیا ہے۔

بھارت نے گزشتہ  31 روز سے    کرفیو نافذ کرکے  کشمیریوں کی آواز دبانے کی کوشش کی ہے لیکن  بھارت کو جان لنا چاہیے کرفیو اور ظلم و ستم سے کبھی بھی کسی  کی آواز کو نہیں دبایا جاسکتا۔

انہوں نے کہا کہ اب عالمی برادری مقبوضہ کشمیر میں بھارتی فورسز کی جانب سے ڈھائے جانے والے مظالم اور انسانی حقوق کی خلاف ورزیوں پر کھل کر بات کر رہی ہے۔

فردوس عاشق اعوان نے کہا کہ وزیراعظم عمران خان نے بھارت کے غیرقانونی اقدام کے بعد مسئلہ کشمیر پر عالمی برادری سے رابطہ کرکے پاکستان کا موقف اُجاگر کیا جو گزشتہ دس سال کے دوران عالمی فورمز پر کسی نے اتنے موثر انداز میں پیش نہیں کیا۔

معاون خصوصی نے کہا کہ ان موثر کوششوں سے امریکی صدر ڈونلڈ ٹرمپ نے اس دیرینہ مسئلے کے حل کے لیے ثالثی کا کردار ادا کرنے کی پیشکش کی جبکہ سلامتی کونسل نے 50 سال بعد مسئلہ کشمیر پر اجلاس بلایا جو پاکستان کی ایک بڑی سفارتی کامیابی ہے۔

انہوں نے مزید کہا کہ تمام سیاسی جماعتوں کو مسئلہ کشمیر اجاگر کرنے کے لیے اپنا فعال کردار ادا کرنا چاہیے کیونکہ یہ ان کی قومی ذمہ داری ہے۔