وزیر اعظم پاکستان کے ایران اور چین کے دوروں کی تاریخیں طے

وزیر اعظم پاکستان   عمران خان کے دورہ  چین اور ایران کی تاریخیں   طے پا گئی ہیں۔

جن  کے مطابق  وزیر اعظم  25 اپریل کوعوامی جمہوریہ چین کا  3 روزہ  سرکاری دورہ کریں گے، جس کی دعوت چینی صدر شی جن پِنگ نے دی تھی۔ وہ  دوران ِ دورہ دوسرے ون بیلٹ ون روڈ فورم میں شرکت کریں گے، جس میں دنیا بھر سے 100 سے زائد ممالک کے سربراہان اور مندوبین کی شرکت متوقع ہے،  عمران خان  چینی صدر اور وزیر اعظم سمیت دیگر اعلی قیادت سے ملاقاتیں بھی کریں گے، ان ملاقاتوں میں پاک چین راہداری منصوبے، دوطرفہ تعلقات اور باہمی دلچسپی کے امور پر بات چیت ہوگی۔

یہ بھی بتایا گیا ہے کہ وزیر اعظم  اس سے قبل 21 اپریل کو   دورہ  ایران سر انجام دیں گے ، ان کے دورے کا مقصد پاک ایران تعلقات کو فروغ دینا ہے،  عمران  خان ایران کے  روحانی پیشوا  آیت اللہ علی خامنہ ای اور صدر حسن روحانی سے ملاقاتیں کریں گے، جس میں وہ امت مسلمہ کو یکجا کرنے پر بھی زور دیں گے۔