ملک میں توانائی بحران پر قابو پالیا گیا ہے : وزیراعظم شاہدخاقان عباسی
وزیراعظم شاہد خاقان عباسی نے کہا کہ ہم نے مختصر عرصے میں وہ کام کیے جو دوسری حکومتیں 10سال میں بھی نہ کرسکیں
وزیراعظم شاہدخاقان عباسی نے کہا ہے کہ آج پاکستان اضافی بجلی کی پیداوار کے قابل ہو چکا ہے اور ملک میں بجلی کی پیداوار ضرورت سے زیادہ ہے۔
وزیراعظم شاہد خاقان عباسی نے کراچی میں پورٹ قاسم کے مقام پر پاور پلانٹ کا افتتاح کردیا۔ یہ پلانٹ سی پیک منصوبے کے تحت تعمیر کیا گیا ہے اور یہ سی پیک میں شامل منصوبوں میں سے پہلا مکمل ہونے والا منصوبہ ہے۔اس منصوبے سے مجموعی طور پر 1320میگاواٹ بجلی تیار کی جائے گی جب کہ مکمل ہونے والے پہلے یونٹ سے 660 میگاواٹ بجلی قومی گرڈ میں شامل ہوگی۔
منصوبےکی افتتاحی تقریب سے خطاب کرتے ہوئے وزیراعظم نے کہا کہ آئندہ سال فروری 2018 تک ہم اس منصوبے کے دوسرے یونٹ کاافتتاح کردیں گے۔ چوتھا ایل این جی بجلی گھر پہلے کے مقابلےمیں 50 فیصد سستا ہے اور مزید منصوبے اور ایل این جی ٹرمینل بھی تعمیر کررہے ہیں جب کہ متبادل ذرائع سے بھی 200 میگا واٹ بجلی حاصل کریں گے۔
وزیراعظم نے کہا کہ ہم نے مختصر عرصے میں وہ کام کیے جو دوسری حکومتیں 10سال میں بھی نہ کرسکیں جب 2013میں ہماری حکومت آئی تو 16 گھنٹے لوڈشیڈنگ تھی لیکن حکومت کی بہترین پالیسیوں کی بدولت ملک میں توانائی بحران پر قابو پالیا گیا اور اب پاکستان بجلی کی اضافی پیداوار کے قابل ہو چکا ہے۔
متعللقہ خبریں
ترک وزیر خارجہ کی پاکستانی ہم منصب سے ملاقات
دو طرفہ تعلقات اور ساتویں پاک ترک اعلیٰ سطحی سٹریٹجک کوآپریشن کونسل کی تیاریوں پر تبادلہ خیال