کشمیر میں ہونےوالی بھارتی جارحیت سے عالمی سربراہان کو آگاہی
وزیر اعظم نواز شریف نے آستانہ میں منعقدہ اجلاس میں شریک عالمی سربراہان سے ملاقاتیں کرتے ہوئے انہیں کشمیر کے حوالے سے اقدام اٹھانے کی اپیل کی ہے
وزیر اعظم پاکستان میاں نواز شریف نے قازقستان میں کہا ہے کہ مقبوضہ کشمیر میں جو جارحیت ہو رہی ہے ہمیں اس پر سخت تشویش ہے اور یہاں پر جن جن رہنماؤں سے ملاقاتیں ہوئی ہیں ان کو مقبوضہ کشمیر کی تازہ صورتحال سے آگاہی کرائی گئی ہے۔
آستانہ میں صحافیوں سے غیر رسمی بات کرتے ہوئے وزیر اعظم نوازشریف نے بتایا کہ افغان صدر اشرف غنی سے ملاقات بہت مثبت رہی جس میں افغانستان میں مشترکہ میکانزم، تجارت، معیشت اور دفاع پر بات چیت ہوئی جن کے حوالے سے عنقریب معاہدے طے پا جائیں گے۔
وزیر اعظم کا کہنا تھا کہ بھارتی وزیر اعظم نریندر مودی سے بھی اچھے ماحول میں بات چیت ہوئی، ایک صحافی نے وزیر اعظم سے سوال کیا کہ اس ملاقات کی تصویر لیک کی گئی ہے جس پر نواز شریف نے کہا کہ لیکس تو بہت ساری ہیں ڈان لیکس، پاناما لیکس لیکن ان سے بنتا کچھ نہیں ہے۔
انہوں نے مزید بتایا کہ چینی اورروسی صدور سے ملاقات میں کشمیر کے حوالے سے بات چیت ہوئی جس میں انہوں نے کہا ہے کہ وہاں پر جو کچھ ہو رہا ہے اس کا جائزہ لیا جانا چاہیے، انہوں نے کہا کہ اقوام متحدہ کے سیکریٹری جنرل سے بھی مقبوضہ وادی میں مظالم پر بات ہوئی، انہوں نے بھی مانا اور انہیں ماننا بھی چاہیے کیوں کہ اس حوالے سے اقوام متحدہ کی قرار دادیں موجود ہیں۔