یوم پاکستان آج شایان شان طریقے سے منایا جارہا ہے

قوم آج یامِ پاکستان اس پختہ عزم کے ساتھ منارہی ہے کہ قومی سلامتی اور یکجہتی کے استحکام کے لئے جانفشانی کے ساتھ کام کیا جائے گا۔
یہ دن لاہور میں انیس سو چالیس کو آج کے دن منظور کی گئی اس تاریخی قرارداد کی یاد دلاتا ہے جس نے جنوبی ایشیا کے مسلمانوں کے لئے الگ وطن کے حصول کا لائحہ عمل فراہم کیا۔
دن کاآغاز وفاقی دارالحکومت میں اکتیس اور صوبائی دارالحکومتوں میں اکیس اکیس توپوں کی سلامی کے ساتھ ہوا۔
مساجد میں نماز فجر کے بعد ملکی ترقی خوشحالی اور یکجہتی کے لئے خصوصی دعائیں کی گئیں۔
آج عام تعطیل ہے تمام اہم سرکاری عمارتوں پر قومی پرچم لہرایا جارہا ہے۔
 آج کے دن کی مرکزی تقریب پریڈ ایونیو اسلام آباد میں فوجی پریڈ ہے جہاںمارچ پاسٹ ہوگا اور جیٹ لڑاکا طیارے شاندار فضائی مظاہرہ پیش کریں گے۔
اس موقع پر فلوٹس مختلف علاقوں کی ثقافت کی نمائش کریں گے۔
 صدر ممنون حسین مہمان خصوصی ہوں گے جبکہ وزیراعظم نوازشریف اورمسلح افواج کے سربراہان بھی رنگا رنگ تقریب میں شرکت کریں گے۔
 شام کو ایوان صدر میں اعزازات دینے کی تقریب ہوگی جہاں صدر ممنون حسین کئی شخصیات کو مختلف شعبوں میں ان کی شاندار خدمات کے اعتراف میں ایوارڈ اورمیڈل دیں گے۔
 ریڈیو پاکستان آج تحریک پاکستان کے مختلف پہلوئوں کے حوالے سے خصوصی پروگرام پیش کررہا ہے اخبارات نے اس موقع پر خصوصی ضمیمے شائع کئے ہیں۔
 ادھر جڑواں شہروں میں کسی بھی نا خوشگوار واقع سے نمٹنے کے سکیورٹی کے خصوصی انتظامات کئے گئے ہیں۔