نوازشریف کیطرف سے عطاءآباد کی پانچ سرنگوں کا افتتاح

وزیراعظم محمد نوازشریف نے شاہراہ قراقرم کے نو تعمیر شدہ حصے کی سرنگوں کا افتتاح کرنے کیلئے عطاآباد روانگی سے قبل ہوائی اڈے پر بیان دیتے ہوئےکہا ہے کہ گلگت بلتستان پاک چین اقتصادی راہداری میں اہم رابطہ ہے اور اس بڑے منصوبے سے اس علاقے کو زیادہ فائدہ حاصل ہو گا ۔اس منصوبے کے پایہ تکمیل تک پہنچ جانے سے سیاحوں کی آمد میں اضافہ ہو گا۔ انہوں نے کہا کہ حکومت نے علاقے کی تقدیر کو سنوارنے کا عزم کر رکھا ہے اور وزیراعلیٰ گلگت بلتستان ایک ولولہ انگیز اور باصلاحیت شخصیت ہیں جنہوں نے اپنے عوام کی دل سے خدمت کی ہے۔
وزیراعظم محمد نوازشریف نے قراقرم ہائی وے کے 24کلو میٹر طویل نئے تعمیر شدہ حصے اور عطاءآباد کی پانچ سرنگوں کا افتتاح کیا ۔ وزیراعظم نے شاہراہ کے نئے تعمیر شدہ حصہ کا جائزہ لینے کے بعد منصوبے کی تختی کی نقاب کشائی کی۔منصوبے پر 27.5 ارب روپے لاگت آئی ہے ۔ انہوں نے قراقرم ہائی وے کے ساتھ تعمیر کی گئی پانچوں ٹنلز کا تفصیلی دورہ کیا۔