نواز شریف کا کنٹرول لائن پر بھارتی جارحیت پراظہار تشویش

وزیر اعظم نواز شریف نے سیالکوٹ ورکنگ باؤنڈری پر بھارتی جارحیت اور معصوم شہریوں کی شہادت پر شدید رد عمل کا اظہار کیا ۔ انھوں نے کہا کہ بھارت شہری آبادی کو نشانہ بنا کر بین الاقوامی قوانین اور معاہدوں کی خلاف ورزیاں کر رہا ہے۔ نواز شریف نے دفتر خارجہ اور وزارت دفاع کے حکام کو بھارت کی سرحدی خلاف ورزیوں کا معاملہ بھارتی حکام کے ساتھ اٹھانے کی ہدایت کی۔
دریں اثناء وزیر دفاع خواجہ آصف نے بھی کہا کہ بھارت دہشتگردی کے خلاف جنگ میں رکاوٹ پیدا کرنا چاہتا ہے۔حالیہ بھارتی جارحیت کا معاملہ عالمی فورمز پر اٹھایا جائے گا اگر جنگ مسلط کرنے کی کوشش کی تومنہ توڑ جواب دیا جائے گا۔ دوسری طرف وزیر داخلہ چودھری نثار علی خان نے بھی برطانوی وزیر خارجہ فلپ ہیمنڈ سے ملاقات کے موقع پر کہ بھارت نت نئے بہانے بنا کر خطے کی سلامتی کو داؤ پر لگا رہا ہے ، بلاجواز اور بلاوجہ ہر مسئلے پر پاکستان کو تنقید کا نشانہ بنانا ناقابل قبول ہے۔