سیاسی اور فوجی قیادت کا اہم اجلاس اسلام آباد میں جاری

اسلام آباد میں وزیرِ اعظم نواز شریف کی زیرِ صدارت ہونے والی اس کل جماعتی کانفرنس میں دہشت گردی کے خلاف قومی لائحہ عمل کی تیاری کے لیے وزیر داخلہ چوہدری نثارعلی خان کی سربراہی میں قائم کی گئی قومی ایکشن کمیٹی کی سفارشات کا جائزہ لیا جا رہا ہے۔وزیرِ اعظم نواز شریف نے اجلاس سے خطاب کرتے ہوئے کہا کہ اب وقت آ گیا ہے کہ کسی اورالمناک واقعے کا انتظار کیے بغیر اکٹھے ہو کر دہشت گردی کے خاتمے کے لیے ٹھوس فیصلے کیے جائیں۔ انھوں نے کہا کہ پہلی مرتبہ دہشت گردی کے خلاف فیصلہ کن جنگ شروع ہوئی ہے اور اگر کمزور فیصلے کیے گئے تو قوم مطمئن نہیں ہوگی۔اس وقت پوری قوم کی نظریں پارلیمانی رہنماؤں کے اس اجلاس پر لگی ہوئی ہیں اور گذشتہ اجلاس میں تمام جماعتیں متحد تھیں۔ وزیر اعظم نے کہا کہ ملک کو غیر معمولی صورتحال کا سامنا ہے ۔اب ملک دشمن عناصر کے خلاف سخت فیصلے کرنا ہوں گے۔آپریشن ضربِ عضب کے بارے میں بات کرتے ہوئے انھوں نے کہا کہ اپریشن ضربِ عضب کے بہتر نتائج سامنے آ رہے ہیں لیکن اس کا دائرہ شمالی وزیرستان کے ساتھ ساتھ ملک کے شہروں تک پھیلانا ضروری ہے۔