لوگوں کو جان کی پڑی ہے عمران خان کو ناچ گانے کی

وزیر اعلیٰ پنجاب شہباز شریف کا کہنا ہے کہ عمران خان کو عوام کا کچھ خیال نہیں ادھر قوم کی مائیں اور بیٹیاں سیلاب میں گھری ہوئی ہیں اور وہ ادھر ہرشب ناچ گانوں کا اہتمام کرتے ہیں۔
ملتان میں متاثرینِ سیلاب سے خطاب میں وزیر اعلیٰ پنجاب نے کہا کہ چین ہمارا بہترین دوست ہے، چینی صدر نے بھارت سے 20 ارب ڈالر کی سرمایہ کاری کے معاہدے کئے اگر یہ پاکستان کا دورہ کرتے تو انہیں پاکستان کے ساتھ 34 ارب ڈالر کی سرمایہ کاری کے معاہدے کرنے تھے۔اس دورے سے ملک میں اندھیرے دور ہونے تھے تا ہم عمران خان اور طاہر القادری کے دھرنوں کی وجہ سے یہ خواب پورا نہ ہو سکا۔
شہباز شریف نے مزید کہا کہ پنجاب میں 1972 کے بعد یہ بدترین سیلاب ہے، صوبے کے عوام سیلاب سے مقابلہ کرنے کی کوششوں میں ہیں لیکن عمران خان اور طاہر القادری کو نہ تو اپنے وطن اور نہ ہی عوام کا کچھ خیال ہے۔ اور تو اور عمران کان ہر رات ناچ گانوں کا اہتمام کرتے ہیں۔ ان کا کہنا تھا کہ وزیر اعظم نواز شریف کی سربراہی میں ہم سیلاب کی تباہ کاریوں سے نمٹ رہے ہیں اورحکومت سیلاب سے متاثرہ آخری گھرانے اور خاندان کے اپنے پاؤں پر کھڑے ہونے تک چین سے نہیں بیٹھے گی۔