ملتان میں کشتی کے حادثے میں دلہا سمیت چودہ افراد ہلاک

آج صوبہ پنجاب کے شہر ملتان کے قریب شادی کی ایک تقریب میں شریک افراد کو بچانے والی ایک ریسکیو کشتی الٹنے سے دلہا اور دو بچوں سمیت کم از کم14 افراد ڈوب کر ہلاک ہو گئے۔
حکام نے خدشہ ظاہر کیا ہے کہ اس حادثے میں مرنے والوں کی تعداد میں اضافہ ہو سکتا ہے کیونکہ جس وقت یہ کشتی ڈوبی، اس پر کم از کم پینتیس افراد سوار تھے۔
واقعہ میں دولہا بھی جاں بحق ہو گیا۔ واقعہ کے بعد ریسکیو اہلکاروں نے ڈوبنے والے افراد کی تلاش کیلئے آپریشن شروع کر دیا۔ امدادی ٹیموں کے مطابق دولہا کو تشویشناک حالت میں ہسپتال لایا گیا لیکن وہ جانبر نہ ہو سکا تاہم دلہن کو بچا لیا گیا۔
وزیراعلیٰ پنجاب میاں محمد شہباز شریف نے کشتی الٹنے کے واقعہ پر اظہار تشویش کرتے ہوئے ریسکیو اہلکاروں کو ہدایت کی ہے کہ وہ سیلابی پانی میں ڈوبنے والے افراد کو نکالنے کیلئے ہر ممکن اقدامات کریں۔ صدر مملکت ممنون حسین اور وزیراعظم میاں محمد نواز شریف نے کشتی حادثہ پر انتہائی افسوس کا اظہار کرتے ہوئے جاں بحق افراد کے ورثا سے اظہار تعزیت کیا ہے۔