ستّر مطلوب عسکریت پسندوں کی فہرست کا اعلان کر دیا گیا

پاکستان کے خیبر قبائلی علاقے کی پولیٹیکل انتظامیہ نے منگل کے روز 70 مطلوب عسکریت پسندوں کی فہرست کا اعلان کیا ہے۔
حکام کے مطابق یہ عسکریت پسند ایجنسی میں دہشت گردی کی کاروائیوں میں ملوّث ہیں۔
انتظامیہ کے حکام نے مطلوبہ عسکریت پسندوں کی فہرست تیار کرنے کی تصدیق کی ہے اور کہا ہے کہ اس فہرست کا اعلان پولیٹیکل اتھارٹی دفتر جمرود میں کر دیا گیا ہے۔
ذرائع کے مطابق یہ اقدام مقامی لوگوں کو ایسے عناصر کی گرفتاری میں مدد دینے کی طرف مائل کرنا ہے جو عسکریت پسندی اور دیگر مجرمانہ سرگرمیوں میں ملوّث ہیں۔
دوسری طرف قبائل کے سرداروں کو بھی متنبہ کیا گیا ہے کہ وہ فہرست میں شامل عسکریت پسندوں کو حکومت کے حوالے کر دیں اگر وہ ایسا نہیں کریں گے تو اجتماعی ذمہ داری کے قانون کے تحت قبائل کے خلاف سخت اقدام کیا جائے گا۔
ذرائع کے مطابق عسکریت پسندوں کو پیش نہ کئے جانے کی صورت میں حکام آپریشن کے پہلو پر بھی غور کر رہے ہیں۔