قبائلی عمائدین کی پاک فوج سے تعاون کی یقین دہانی
شمالی وزیرستان کے قبائلی عمائدین نے پاک فوج کو طالبان کے خلاف جنگ میں بھر پور تعاون کا عندیہ دیا ہے
ڈائریکٹر جنرل آئی ایس پی آر میجر جنرل عاصم سلیم باجوہ نے ٹویٹر پر جاری اپنے پیغام میں کہا ہے کہ شمالی وزیرستان کے علاقہ جات کے قبائلی عمائدین نے آپریشن ضرب عضب میں پاک فوج سے بھر پورتعاون کی یقین دہانی کرائی ہے۔
ان کا کہنا تھا کہ قبائلی عمائدین نے یقین دلایا ہے کہ دہشتگردوں کو واپس آنے کی اجازت نہیں دی جائیگی۔
اس سے قبل پاکستان کے وزیراعظم نواز شریف نے قبائلی علاقے شمالی وزیرستان میں عسکریت پسندوں کے خلاف جاری آپریشن "ضرب عضب"کی تازہ صورتحال جاننے کے لیے جمعہ کو صوبائی دارالحکومت پشاور کا مختصر دورہ کیا۔
اس دورے میں پاک فوج کے سربراہ جنرل راحیل شریف، وزیر دفاع خواجہ آصف اور سافرون کے وفاقی وزیر عبدالقادر بلوچ بھی ان کے ہمراہ تھے۔
وزیراعظم نواز شریف نے کور ہیڈ کوارٹر پشاور کا دورہ کیا جہاں انھیں شمالی وزیرستان میں جاری آپریشن سے متعلق تفصیلی بریفنگ دی گئی۔
ذرائع کے مطابق بریفنگ میں وزیراعظم نواز شریف اور فوج کے سربراہ کو بتایا گیا کہ غیر ملکی شدت پسند نہ صرف پاکستان بلکہ خطے کے سلامتی کے لیے بھی بڑا خطرہ بنے ہوئے تھے اور ان نیٹ ورک کو بیرونی ممالک سے امداد مل رہی تھی۔
اس موقع پر وزیر اعظم نواز شریف نے کہا کہ فوج کو آپریشن ضرب عضب میں تمام وسائل فراہم کیے جائیں گے۔