شام میں فائر بندی کی خلاف ورزی کرنے والے گروپوں کو روس کی وارننگ

روس نے شام میں جاری عبوری فائر بندی کے باوجود ہونے والی جھڑپوں کے خاتمے اور سمجھوتے کی خلاف ورزی کرنے والے گروپوں کے خلاف فضائی حملے شروع کرنے کے بارے میں متنبہ کیا ہے۔

روس نے کہا ہے کہ وہ شام میں فائربندی کی خلاف ورزی کرنے والے کے خلاف یک طرفہ طور پر طاقت کا استعمال کر سکتا ہے۔ روس کی جانب سے امریکا کو خبردار کیا گیا ہے کہ اگر اس نے فائربندی کی خلاف ورزی پر طاقت کے استعمال سے متعلق قواعد وضع کرنے سے اجتناب کیا، تو روس اکیلے ہی عسکری کارروائیاں شروع کر دے گا۔

روسی فوج نے الزام عائد کیا ہے کہ امریکا اس سلسلے میں روسی تجاویز سے جان بوجھ کر پیچھے ہٹ رہا ہے اور بات چیت نہیں کر رہا۔