میکسیکو میں فٹ بال اسٹیڈئیم میدان جنگ بن گیا

میکسیکو میں فٹبال میچ کے دوران شائقین گتھم گتھا ہوگئے جس کے نتیجے میں  22 افراد زخمی ہوگئے جبکہ 17 کے ہلاک ہونے کی اطلاعات ہیں۔

بتایا گیا ہے  میکسیکو کی فٹبال لیگ میں کوئریٹارو اور اٹلاس کے درمیان کھیلے جانے والا میچ میدان میں موجود شائقین کے درمیان لڑائی کی وجہ سے 63 منٹ کے بعدختم کردیا گیا۔

خبر کے مطابق، کھلاڑیوں نے بھی شائقین کے درمیان جھگڑے کو روکنے کی کوشش کی لیکن شائقین ایک دوسرے کو مارتے رہے۔

واقعے میں کم از کم 22 افراد زخمی ہوئے جن میں سے 2 کی حالت تشویشناک ہے۔

دوسری جانب یہ بھی اطلاعات ہیں کہ میچ میں ہونے والی لڑائی میں17 افراد بھی ہلاک ہوئے ہیں تاہم اس کی آزاد ذرائع سے تصدیق نہیں ہوسکی ہے۔

لیگ کے صدر نے کہا کہ  گزشتہ روز کھیلے جانے والے تمام میچز  زخمی ہونے والے افراد کے ساتھ اظہار یکجہتی کے لیے معطل کر دیے گئے ہیں۔

انہوں نے کہا کہ اسٹیڈیم میں سلامتی کے ذمہ داروں کو مثالی سزا دی جائے گی۔