بنگلہ دیش کے دورے سے قبل کرکٹ کھلاڑیوں کے حتمی معاہدے

پاکستان کرکٹ بورڈ نے قومی کرکٹرز کیلئے نئے مرکزی معاہدے کو حتمی شکل دے دی ہے۔
جس کی رو سے ایک سالہ معاہدے کا اطلاق یکم جنوری سے ہوگا اور حالیہ کارکردگی کو بالائے طاق رکھتے ہوئے بعض کھلاڑیوں کی کیٹیگری میں ترقی یا تنزلی متوقع ہے۔
تفصیلات کے مطابق ورلڈکپ سے قبل پی سی بی اور کھلاڑیوں کے مابین سینٹرل کنٹریکٹ کے معاملات طے نہیں پائے تھے،بورڈ نے ان کو 3 ماہ کا عارضی معاہدہ پیش کیا تھا جس پرکسی پلیئر نے دستخط نہیں کیے، بورڈ نے کھلاڑیوں سے ٹور کنٹریکٹ ہی کو کافی سمجھا۔
ذرائع کے مطابق پی سی بی کی ہدایت پرہارون رشید کی سربراہی میں نئی سلیکشن کمیٹی نے نئے سینٹرل کنٹریکٹ کو حتمی شکل دیدی ہے،اس حوالے سے تینوں کپتانوں مصباح الحق، اظہرعلی اور شاہد آفریدی کی رائے بھی لی گئی ہے، معاہدہ یکم جنوری سے 31 دسمبر تک ایک سال پر محیط ہوگا۔جس کا اعلان قومی ٹیم کی دورہ بنگلہ دیش پر روانگی سے قبل متوقع ہے۔