افغانستان میں بارودی سرنگیں صاف کرنے والے 15 اہلکار اغوا

افغان عہدیداروں کا کہنا ہے مسلح افراد نے مغربی افغانستان میں بارودی سرنگیں صاف کرنے والے 15 کارکنوں کو اغوا کر لیا ہے جن کی بازیابی کے لیے فوجی کارروائی کی جارہی ہے۔

یہ ایرانی سرحد سے متصل ہرات صوبے کے کوہسان ضلع میں پیش آیا۔ صوبائی گورنر اور پولیس کے عہدیداروں کا کہنا ہے کہ اغوا کیے جانے والے تمام افراد افغان شہری ہیں اور وہ بارودی سرنگیں صاف کرنے والی ایک غیر سرکاری تنظیم 'ہالو' کے لیے کام کرتے تھے۔

انہوں نے اغوا کے اس واقعہ کا الزام طالبان عسکریت پسندوں پر عائد کیا ہے۔

جنگ کے شکار افغانستان کا شمار دنیا کے ان ممالک میں ہوتا ہے جہاں سب سے زیادہ بارودی سرنگیں بچھی ہوئی ہیں۔

گزشتہ سال کے دوران بارودی سرنگوں اور بارودی مواد پھٹنے سے 388 افغان شہری ہلاک یا زخمی ہوئے اور ان واقعات میں 2014 کے مقابلے میں 18 فیصد کمی واقع ہوئی ہے۔