نیپال اور بھارت:ہلاکتوں کی تعداد سینکڑوں تک جا پہچنی
نیپال میں حکام کا کہنا ہے کہ گزشتہ ہفتے کی طوفانی بارشوں کے باعث آنے والے سیلابوں اور مٹی کے تودے گرنے سے ہلاکتوں کی تعداد 180 سے زائد ہو گئی ہے جب کہ متعدد افراد اب بھی لاپتہ ہیں
نیپال میں حکام کا کہنا ہے کہ گزشتہ ہفتے کی طوفانی بارشوں کے باعث آنے والے سیلابوں اور مٹی کے تودے گرنے سے ہلاکتوں کی تعداد 180 سے زائد ہو گئی ہے جب کہ متعدد افراد اب بھی لاپتہ ہیں۔
مٹی کے تودوں اور سیلاب نے بھارت کی سرحد کے قریب نیپال کے مغربی میدانی علاقوں میں کئی دیہات اور سٹرکوں کو تباہ کر دیا جس سے متاثرہ علاقوں میں ہزاروں افراد محصور ہو گئے۔
ہنگامی صورتحال سے نمٹنے والے ادارے کے عہدیداروں کا کہنا تھا کہ چار ہیلی کاپٹر خوراک، ادویات اور دیگر امدادی سامان و طبی عملے کے ساتھ متاثرہ دیہات کی جانب روانہ کر دیے گئے ہیں۔
حکام کا کہنا تھا کہ صاف پانی کی کم دستیابی سے جان لیوا بیماری ہیضہ وبا کی صورت میں پھیلنے کا خطرہ ہے۔
شمالی بھارت میں بھی حالیہ بارشوں سے چند دیہات سیلاب کی زد میں آئے اور چوراسی افراد ہلاک ہوئے۔
واضح رہے کہ اس خطے میں ہر سال سینکڑوں افراد مون سون کی بارشوں کے باعث آنے والے سیلابوں اور مٹی کے تودوں کے گرنے سے ہلاک ہوتے ہیں۔
