بچوں سے زیادتی کا مجرم موت کی سزاپائے گا: صدر ہند نے قانون منظور کر دیا

بھارتی صدر رام ناتھ کوند نے بچوں کے ساتھ زیادتی کے ملزمان کو سزائے موت دینے کے لیے کابینہ کے منظور کردہ قانون  پر دستخط کر دیئے ہیں۔

خبر کے مطابق، بھارتی صدر رام ناتھ نے" تحفظ اطفال  "نامی  قانون میں سزائے موت سے متعلق ترمیمی قانون  پر دستخط کر کے اس  کی توثیق کردی ہے جس کے بعد  اس قانون کو دونوں پارلیمان میں پیش کیا جائے گا جہاں منظوری کے بعد یہ ترمیمی بل فوری طور پر نافذ العمل ہو جائے گا۔

 گزشتہ روز وزیراعظم نریندر مودی کی سربراہی میں ہونے والے کابینہ اجلاس میں بچوں کے ساتھ زیادتی کے مجرموں کو سزائے موت دینے کے لیے قانون میں ترمیم کی متفقہ طور پر منظوری دی گئی تھی۔

پارلیمان سے منظوری کے بعد اس قانون کے تحت 12 سال سے کم عمر بچوں کے ساتھ زیادتی کرنے والے ملزمان کو کم سے کم سزا 20 سال یا تاحیات قید اور زیادہ سے زیادہ سزائے موت دی جا سکے گی۔

 اس سے قبل اس جرم کی سزا محض 7 سے 10 سال قید تھی۔

 کشمیر اور ممبئی میں بچیوں کے ساتھ ہونے والی زیادتی کے واقعات کے بعد شدید عوامی دباؤ کا سامنا کرنے والی مودی سرکار معصوم بچوں کو درندگی کا نشانہ بنانے والے ملزمان کے لیے سزائے موت کے قانون کی منظوری دینے پر مجبور ہوئی۔

واضح رہے کہ بھارتی زیر کنٹرول کشمیر میں کمسن بچی آصفہ بانو کے ساتھ مندر کے تہہ خانے میں چار دن اجتماعی زیادتی کے واقعے پر احتجاجی مہم نے زور پکڑ لیا ہے۔

ان  افسوسناک واقعات میں حکمراں جماعت کے اراکین کے ملوث ہونے سے مودی کابینہ شدید دباؤ کا شکار تھی۔

یاد رہے کہ  بھارت میں ہر 15 منٹ میں ایک بچے کو زیادتی کا نشانہ بنایا جاتا ہے اور گزشتہ سال ایسے واقعات میں 85 فیصد اضافہ ہوا تھا جب کہ رواں سال بھی ان واقعات میں تیزی دیکھنے میں آئی ہے۔