ڈونلڈ ٹرمپ کے صدر منتخب ہونے کی سرکاری طور پر توثیق
ٹرمپ بیس جنوری کو با ضابطہ طور پر اپنے عہدے کا حلف اٹھاتے ہوئے اپنے عہدے پر فائز ہو جائینگے
متحدہ امریکہ میں 8 نومبر کے انتخابات میں فتح یاب رہنے والے ڈونلڈ ٹرمپ کی ملک بھر میں 538 رکنی الیکٹورل کالج کی ووٹنگ میں لازمی 270 نشستوں کی حد کو پار کرتے ہوئے صدر بننے کی توثیق کر دی گئی ہے۔
اب ڈونلڈ ٹرمپ 20 جنوری کو امریکی صدر کے عہدے کا باضابطہ حلف اٹھائیں گے۔
دوسری جانب امریکی صدارتی انتخاب کے 6 ہفتے بعد کل امریکہ کے الیکٹورل کالج میں اگلے امریکی صدر اور نائب صدر کے لیے پولنگ ہوئی۔
ہر امریکی ریاست سے چنے گئے 538 نامزد اراکین نے اگلے امریکی صدر اور نائب امریکی صدر کے انتخاب کے لیے ووٹ ڈالے۔ الیکٹورل کالج کے نتائج سے 6 جنوری کو سرٹیفکیٹ آف ووٹ تیار کیا جائے گا جو کہ حکومتی ریکارڈ کا مستقل حصہ بن جائے گا ، بعد ازاں ڈونلڈ ٹرمپ 20 جنوری 2017 کو امریکہ کے 45 ویں صدر کی حیثیت سے اپنے عہدے کا باضابطہ حلف اٹھائیں گے۔
واضح رہے کہ ان انتخابات کا نتیجہ ملکی سطح پر منعقد ہونے والے انتخابات کے نتائج کے قریب ہی ہوتا ہے۔