ترکی میں مذموم حملے کی دنیا بھر سے مذمت
دنیا کے کئی سربراہان نے ترکی سے اظہار افسوس و یکجہتی کیا ہے
یورپی کونسل کی پارلیمانی اسمبلی نے استنبول کے دہشت گرد حملے کی مذمت کی ہے۔
اسمبلی کی جانب سے جاری کردہ تحریری اعلامیہ میں بتایا گیا ہے کہ انقرہ کے سرکاری دورے پر موجود پورپی کونسل کے قائدِ اسمبلی پیدرو اگرامونت کو وزیر اعظم بن علی یلدرم سے ملاقات کے دوران اس حملے کی اطلاع ملی ۔
اگرامونت نے اس ملاقات کے دوران استنبول کے بیاضیت چوک میں بم حملے کی شدید مذمت کرتے ہوئے ترک عوام اور حکومت کے ساتھ قریبی تعاون کا اظہار کیا اور ہلاک شد گان کےلواحقین سے تعزیت کی۔
اعلامیہ میں مزید کہا گیا ہے کہ "دہشت گردوں کی مذموم اور غیر انسانی کاروائیوں نے ایک بار پھر استنبول کو نشانہ بنا یا ہے۔ دہشت گرد؛ مشترکہ اقدار، اداروں اور طرز ِ زندگی کو ہدف بنا رہے ہیں۔ اب دہشت گردی شام اور عراق میں روزانہ کے حملوں کے ساتھ ساتھ باماکو سے بیروت تک، پیرس سے استنبول تک تمام تر دنیا کے لیے ایک سنگین خطرہ بن چکی ہے۔ "
اعلامیہ میں یہ بھی پیغام دیا گیا ہے کہ "خوف و نفرت کے بیج بوتے ہوئے ہمارے معاشروں کی بنیادوں کو عدم استحکام سے دو چار کرنے کی کوشش کرنے والے دہشت گروں کی چالوں کو محض اتحاد و یکجہتی کے ذریعے ہی ناکام بنایا جا سکتا ہے۔ "
اُدھر قطر نے بھی استنبول کے بم حملے کی مذمت کی ہے۔ قطری دفترِ خارجہ سے جاری کردہ اعلامیہ میں واضح کیا گیا ہے کہ قطر ، جمہوریہ ترکی کے شانہ بشانہ ہے۔ ہم آج صبح استنبول میں پیش آنے والے بم حملے کی شدید مذمت کرتے ہیں اور ترکی کے اپنی سلامتی و استحکام کا تحفظ کرنے کی خاطر تمام تر اقدامات کی حمایت کرتے ہیں۔
اعلامیہ میں مزید کہا گیا ہے کہ وجہ چاہے کچھ بھی کیوں نہ ہو قطر ہر طرح کی پُر تشدد اور دہشت گرد کاروائیوں کی مخالفت کرتا ہے ، ہلاک والوں کے لواحقین کے دکھ میں برابر کا شریک ہے اور زخمیوں کی جلد از جلد شفا یابی کا دعا گو ہے۔
