Daşary ýurt metbugatyna syn
Daşary ýurt köpçülikleýin habar beriş serişdeleri Türkiýe bilen bagly habarlara giňişleýin orun berýärler
Britaniýanyň El-Şark El Ewsat habarlar saýty: “Wise-premýer Numan Kurtulmuş bilen reportaž” söz başyly habarynda, Wise-premýer Numan Kurtulmuşyň Türkiýäniň soňky wagtlarda Ýewropa Bileleşiginiň iki ýüzli we taraply syýasatlary bilen ýüz-ýüzedigini aýdandygyny habar berýär. Habarda Bileleşigiň söz bermegine garamazdan bosgunlara maddy taýdan kömek bermeýändigini we türklere wiza erkinligini döretmeýändigini bellän Kurtulmuşyň: “ÝB wizalary aýyrmasa bosgunlaryň Ýewropa serhedine geçmegini öňüni almagymyzy goý bolsun ederis” diýendigi bellenýär. Habarlar saýty Kurtulmuşyň mundan başgada: “Şanhaý hyzmatdaşlyk guramasyna agza ýurtlar bilen ýakynlaşmagymyz we hatda bu gurama agza bolmagymyz Günbatar ýurtlar bilen bolan gatnaşyklarymyzyň we ÝB-ne agza bolmak islegimiziň wajyplygyny azaltmaz” diýendigini beýan edýär.
Italiýanyň il Giornale gazedi: “Ýewropada bosgun howsalasy” söz başyly habarynda, ÝB-niň Türkiýäni agzalyk gepleşikleri babatynda dürli-dürli bahanalar bilen güýmemeginiň we beren wadalarynda durmazlygynyň Türkiýe tarapyndan nägilelik bildirilýändigini mälim edýär. Gazet hökümetiň agzalarynyň bosgun meselesi babatyndaky agyr ýüki paýlaşmak islemeýän we türklere wize erkinligini döretmeýän ikiýüzli Günbatar ýurtlaryna garşy Ýewropa gitmek isleýän bosgunlara germewleri açjakdygy barada ýüzlenmeler bermäge başlandygyny nygtaýar. Habarda bu ýagdaýyň şonsuzam bergileri bilen kellesini galdyryp bilmeýän resmi Afinyny binjalyk edýändigi, Türkiýede çadyr düşelgelerde galýan siriýaly bosgunlaryň bolsa ýollar açylan halatynda Ýewropa gitjekdiklerini aýdýandyklaryny ýazýar.
Russiýanyň Ria Nowosti habarlar gullugy: “Türkiýe syýahatçylyk pudagyna goldaw bermek programasyna dowam etdirer” söz başyly habarynda, Premýer ministr Binali Ýyldyrymyň türk resmileriniň ýurtda syýahatçylyk pudagyna öňümizdäki ýyl hem goldaw bermäge dowam etdirjekdiklerini aýdandygyny okyjy köpçüliginiň dykgatyna ýetirýär. Habarlar gullugy Ýyldyrymyň: “Türkiýä turist getirýän syýahatçylyk kärhanalaryna 2017-nji ýylda turistleriň sanyny artdyrmak maksady bilen her bir çarter saparyna 6 müň dollar beriler. Uçar 200-den gowrak syýahatçyny getiren halatynda bolsa 7800 dollar beriler” diýendigine ünsi çekýär. Habarda hökümetiň berýän goldawlaryny mysal getiren Binali Ýyldyrymyň 2016-nji ýyldan bäri 417996 kiçi we orta ululykdaky kärhanalaryň kredit mukdarynyň 19,5 milliard lira ýetendigini aýdandygy bellenýär.
Britaniýanyň Reuters habarlar agentligi: “Adanadaky bombaly hüjümiň jogapkärçiligini terror guramasy PKK öz üstüne aldy” söz başyly habarynda, terror guramasy PKK-nyň gollarynyň biri bolan TAK guramasynyň geçen hepde 2 adamyň ýogalmagyna we 33 adamyň ýaralanmagyna sebäp bolan bomba ýüklenen ulag bilen guralan hüjümiň jogapkärçiligini öz üstüne alandygyny habar berýär. Habarda TAK guramasynyň ABŞ-nyň goşuny tarapyndan Siriýada terror guramasy DAIŞ-e garşy hüjümleri guramak üçin ulanylýan Injirlik howa bazasyndan takmynan 16 km uzaklykda ýerleşýän Adana welaýat häkimliginiň ulag goýulýan parkynda penşenbe güni bomba ýüklenen ulag bilen guralan hüjümiň arkasynda özüniň bardygyny aýdandygy, TAK-yň ozal hüm Türkiýede guralan ençeme bombaly hüjümiň jogapkärçiligini öz üstüne alandygyny aýdandygy nygtalýar.
