شیخ محمد بن زاید آل نهیان د متحده عربي اماراتو د نوي ولسمشر په توګه وټاکل شو.

د متحده عربي اماراتو فدرالي عالي شورا نن د رایو په اتفاق شیخ محمد بن زاید آل نهیان د متحده عربي اماراتو د ولسمشر په توګه وټاکه.

دې شورا نن د ابوظبۍ په المشريف ماڼۍ کې د دوبۍ د امیر  لومړي وزیر شیخ محمد بن راشد آل مکتوم په مشرۍ غونډه وکړه.

د ولسمشرۍ د چارو د وزارت له خوا په خپره شوې خبرپاڼه کې راغلي دي چې د اساسي قانون د ۵۱ مادې له مخې جلالتمآب شیخ محمد بن زاید آل نهیان په متفقه توګه د مرحوم شیخ خلیفه بن زاید آل نهیان د ځای ناستي په توګه د متحده عربي اماراتو د ولسمشر په توګه وټاکل شو.

جلالتمآبانو، د عالي شورا غړو او د اماراتو واکمنانو د مرحوم شیخ خلیفه د بنسټ ایښودونکي، مرحوم شیخ زاید بن سلطان آل څخه د پیروي کولو د مستند ارزښتونو او اصولو پلي کولو ته د دوام ورکولو په اړه خپل لیوالتیا یو ځل بیا تایید کړه.

شیخ محمد بن زاید د خپلو وروڼو، د عالي شورا د غړو او د اماراتو د واکمنانو له خوا په ده باندې د هغه ارزښتناک اعتماد له امله قدرداني څرګنده کړه او له لوی څښتن څخه یې د دغه ستر امانت د ادا کولو او د هغه په ​​پوره کولو کې د هدایت او مرستې دعا وکړه.

د ویلو ده چې د متحده عربي‌ اماراتو ولسمشر شیخ خلیفه زاید آل نهیان پرون د ۷۳ کلونو په عمر ژوند د لاسه ورکړ چې پرون يي جنازه خاورو ته وسپارل شوه.

د متحده عربي‌ اماراتو د ولسمشرۍ چارو وزارت د پرون نه په اعتبار سره په هیواد کې ۴۰ ورځې رسمي‌ ماتم اعلان کړ. بیرغونه يي نیمه راځوړند کړل. همداشان په وزارتخانو، دولتي‌ اداراتو او خصوصي سکتور کې درې ورځې رخصت اعلان شو.